Олимлар иқлимнинг глобал исиши натижасида дунё океани сатҳи кўтарилиши, қуруқликнинг катта қисми сув остида қолиши билан қўрқитиб келади. Аммо бу узоқ келажак ҳақидаги башорат эмас, бугунги кундаги ҳолат деса ҳам бўлади, деб ёзади Travel Ask.
Мутахассислар ҳисоб-китобларига кўра, муз қатламлари эриши оқибатида дунё океанининг ўртача сатҳи йилига 3 миллиметрга кўтарилмоқда. Аммо баъзи жойларда, шу жумладан, Тинч океанининг ғарбий қисмларида бу жараёнлар жадалроқ бормоқда: ушбу ҳудудда сув сатҳи йилига 12 миллиметрга кўтарилмоқда. Бундай кўрсаткичлар бу ерда 90 йиллар бошидан буён кузатилмоқда.
2016 йилда австралиялик географлар Тинч океанининг жануби-ғарбий қисмида жойлашган, 1000 дан ортиқ оролларни ўз ичига олган Соломон ороллари архипелагидан бешта орол ғойиб бўлганини аниқлади. 2017 йилда эса ўша ҳудуддаги Микронезиядан бир нечта орол йўқ бўлиб қолди. Қатор ороллар эса майдонининг катта қисмидан ажралди.
Ушбу ороллар мисолида дунё океани сатҳининг ошиши ҳақиқатдан узоқ бўлган, ерликларнинг кейинги авлоди дуч келиши мумкин бўлган ҳодиса эмас, балки аллақачон юз беришни бошлаган реаллик эканлигини кўришимиз мумкин, дейилади хабарда.
Изоҳ (0)