Халқаро футбол уюшмаси ФИФА терма жамоаларнинг янги рейтингини эълон қилди. Унда Ўзбекистон миллий термаси 76-ўринга қараб шўнғиганини кўриш мумкин.
Бу аввалги рейтингдан 7 поғона пасайиш деганидир. ЖЧ—2018 саралаши вақтида Ўзбекистон термаси Осиёнинг олтинчи мамлакати бўлиб турганди. Энди эса Хитой ва Амирлик термалари ҳам Ўзбекистонни ортда қолдирган. Саралашда ўзбекистонлик футболчилар айнан Хитойга имкониятни бой берган, Амирлик термаси эса ЖЧ чиптасини қўлга киритган Саудияни таслим қилишга муваффақ бўлганди.
Осиёда ҳамон форслар етакчи — 34-ўрин. Ваҳоланки улар 9 поғона шўнғишга мажбур бўлган. Австралияда ўсиш кузатилган ва улар Японияни ортда қолдира бошлаган. Жанубий Корея Жаҳон Чемпионатига йўлланмани қўлга киритган бўлса-да, Хитойни ўтказиб юборди. Чунки кореяликлар саралашда Эрон ва Ўзбекистонни енга олмади. Хитой эса кетма-кет ғалабани қўлга киритди.
Ўзбекистон термасини мағлуб этган Сурия 77-ўриндан жой олди. Улар ҳозирча ёнма-ён. Навбатдаги рейтингда Сурия илгарилаб кетиши ҳам мумкин.
Жаҳонда эса Германия пешқадам. Немислар ЖЧ—2018 саралашининг 10 та ўйинида 10 та ғалабага эришганди. Мундиал чиптасини энг биринчи бўлиб қўлга киритган Бразилия иккинчи, кучли учликни эса Европа чемпиони Португалия якунлаган.
Изоҳ (0)