Ироқлик қочоқ қиз берлинлик пенсионернинг метрода унутиб қолдирилган 14 минг евросини қайтариб берди

Ироқлик 16 ёшли қочоқ қиз Берлин метросида 14 минг евро топиб олди ва уни қонуний эгасига қайтарди. Бу ҳақда Deutsche Welle хабар берди.

Берлинлик 78 ёшли аёл ичида пули бор сумкасини 15 сентябрь куни кечқурун метрода унутиб қолдирган. Сумкаси йўқолганини билган аёл метро ходимларига хабар берган, бироқ улар ҳеч нарса қила олмаган.

Икки кундан сўнг полиция бўлимига қочоқлар марказида яшовчи 16 ёшли қиз онаси билан келган. У полиция ходимларига вагонда топиб олинган сумкани топширган. Пулларга тегилмаган эди.

Энди қочоқлар оиласи хайрли иш учун муносиб мукофот кутмоқда. Германия қонунчилигига кўра, топиб олинган пул ёки қимматбаҳо буюмни қайтарганлик учун пул суммасининг ёки буюм қийматининг уч фоизи миқдорида мукофот берилади. Пул ёки буюм жамоат транспортида топилган тақдирда, мукофот миқдори икки баравар камаяди. Шундай қилиб, қиз 210 евро олиши мумкин.