Ота-она қизини ҳаётни таъминлаш ускунасидан узиб қўйишдан олдин уни сўнгги марта ўпди, аммо шу пайт қизча кутилмаганда уйғониб кетди

Буюк Британияда Франческа ва Ли Мур-Уильямс исмли эр-хотин Бобби ва Белла исмли фарзандлари билан бахтли ҳаёт кечирар эди, деб ёзади Infinity Fun.

Уларнинг қизалоғи Белла 18 ойлик чоғида тўсатдан хасталаниб, сочлари тўкилиб кета бошлади. Ота-онаси уни Лондондаги энг яхши касалхоналардан бирига олиб борди. Белланинг бошини магнит-резонанс томография орқали текширган шифокорлар унинг миясида баъзи бир аномалияларни аниқлади. Қизчанинг аҳволи ёмонлашиб бораверди, охир-оқибат, Белланинг ҳаётини сақлаб туриш учун уни ускуналарга улаб қўйишди.

Тиббий таҳлилларга кўра, чақалоқда B12 витамини танқис бўлиб, унинг танаси организм ҳужайралари соғлом бўлиб ўсиши учун зарур ферментларни мустақил ишлаб чиқара олмасди.

Белла азоб чеккан камёб касаллик ўртача ҳар 60 000 боладан биттасида учрайди ва уни даволаш деярли имконсиз.

Шифокорлар қизалоқнинг ота-онасига у яшаб кетмаслигини аниқ-равшан билдирди. Франческа ва Ли, охир-оқибат, қизини ускуналардан узиб қўйишга қарор қилди, чунки улар фарзанди умрининг қолган қисмини жон талвасасида ўтказишини истамади.

Шу куни бутун оила ва дўстлар Белла билан видолашиш учун касалхонага йиғилди. Ота-она кўзида ёш билан фарзандини ўпиб, у билан хайрлашди. Кутилмаганда қизалоқ дадасининг бармоғини қаттиқ ушлаб олди. Унинг тана ҳарорати кўтарилиб, танасига қизиллик югурди ва уйғониб, бақира бошлади.

Палатага шифокорлар югуриб келди. Ҳамма қизалоқни жон беради, деб турган вақтда, унинг кўрсаткичлари ўз-ўзидан яхшиланди, бу бутун касалхона ходимлари учун ҳам кутилмаган ҳолат бўлди.

Бир неча ҳафталик интенсив даволанишдан кейин Белла соғлом ҳолатда уйига қайтишга муваффақ бўлди. Ҳозир у хурсандчилик билан кулади, дўстлари билан югуради, ўйнайди, сочлари эса яна ўсиб кетди.