28 август куни Шайхонтоҳур туманидаги «Сузук ота» жоме масжидининг биринчи ғишти қўйилди. Бу ҳақда Мусулмонлар идорасининг расмий сайтига асосланиб, UZ24 хабар берди.
Жорий йилнинг 26 май куни Ўзбекистон Президенти Шавкат Мирзиёев «Сузук ота» мақбараси ва жоме масжидида бўлиб, мутасаддиларга мақбара ва масжидни реконструкция қилиш, атрофини ободонлаштириш бўйича топшириқлар берган эди.
«Ушбу масжид ва мақбара маънавиятимизни янада юксалтиришга, юртимизда эзгулик нурини зиёда этишга хизмат қилиши керак. Бу ерда ҳунармандлар маркази ва кутубхонаси ташкил этиш лозим», — деган эди давлат раҳбари.
Тарихчи олим Асқар Обидовнинг маълумот беришича, Сузук отанинг исми Мустафоқул бўлиб, 1140 йилда таваллуд топган. У Аҳмад Яссавийнинг қизи Гавҳари Ҳуштожнинг кенжа ўғли бўлган. Болалик чоғида бобоси у кишини эркалаб «Менинг сузигим (суюклигим), хуш келдингиз!», дегани боис шу исм бўлиб қолган. Сузук ота юзлаб шогирдларга илм бериб, ҳунарга, ҳалол меҳнатга ўргатган. 1217 йилда вафот этган. 1391 йилда Амир Темур Яссавийнинг набираси Сузук ота қабри устида мақбара ва масжид бунёд эттирган.
Изоҳ (0)