Россия либерал-демократик партияси етакчиси Владимир Жириновский Россия президенти Владимир Путин ўз фаолияти давомида қандай хатоларга йўл қўйганини санаб ўтди. Бу ҳақда у видеоблогер Юрий Дудга берган интервьюсида айтиб ўтди, деб хабар қилади «РБК».
Дудь Жириновский Путинга қарши борган уч масалани айтишни сўради.
«Мамлакат ичидаги ҳудудларни катталаштириш. Улар олтитасини (мухтор округларни) йўқ қилди ва шу билан тўхтади, бу хато эди, давом эттириш керак эди», — деди Жириновский.
Жириновскийнинг фикрича, Путиннинг иккинчи хатоси «бутун Украинани олмагани», яъни Қрим билангина чекланганидир. У Путинга қадар ҳам — 1991 йилдаёқ шу нуқтаи назарда турганини билдириб ўтди. Сиёсатчининг сўзларига қараганда, ўшанда «биз (Россия) мамлакатни бировларга бўлиб бердик».
Жириновский Путинга норозилик билдирган учинчи масала кичик бизнес билан боғлиқ сиёсатдир.
«Кичик бизнес ўхшамаяпти. Ваъда беришяпти, беришяпти... лекин биз туртки бермаяпмиз. Бизда аллақачон қудратли иқтисодиёт бўлиши лозим эди... Полиция ва ФСБга кичик бизнесни ҳимоя қилиш буйруғини бер. Ҳеч ким ҳеч нарса қила олмаяпти — шу пайтгача хусусий мулкни тортиб олиш, рейдерлик давом этмоқда», — таъкидлади Жириновский.