15 август куни ўтказилган ўрта махсус, касб-ҳунар таълими муассасаларига саралаш тест синовларининг натижаларини ҳисоблаш ишлари якунига етди. Бу ҳақда «Ўзбекистон 24» хабар бермоқда.
Абитуриентлар бугун, 20 август куни саралаш тест синовида тўплаган балларини қабул комиссияларининг эълонлар тахталарида жойлаштирилган саралаш тест синови натижалари қайдномаларидан билиб олиши мумкин.
Шунингдек, саралаш тест синови натижасини мобил телефони орқали билиб олиш тизими ҳам йўлга қўйилган. Бунинг учун мобил телефонлари орқали жавоблар варақаси рақамини 5100 рақамига SMS кўринишида жўнатиш ва тўплаган умумий баллни, ўқувчиликка тавсия этилган ёки этилмаганини билиб олиш мумкин.
Саралаш тест синови натижасини Давлат тест марказининг расмий веб-сайти орқали билиш хизмати ҳам йўлга қўйилди. Бунинг учун тест натижалари бўлимига кириб, «Ўрта махсус, касб-ҳунар таълими муассасаларида ўтказилган саралаш тест синовлари натижалари» саҳифасининг тегишли катакчасига абитуриент ўзига тегишли жавоблар варақаси рақамини киритиш лозим.
Изоҳ (0)