Дунёдаги энг қиммат болалар машинаси 100 минг долларга баҳоланди

Буюк Британияда «дунёдаги энг қиммат болалар автомобили» сотувга қўйилди. Ferrari Testarossa спорткари 75 минг фунт стерлингга (97 минг АҚШ доллари атрофида) баҳоланди. Бу ҳақда The Sun нашрига таяниб, «Мотор» хабар берди.

Ушбу болалар автомобили ўлчамлари бўйича ҳақиқий Testarossa’дан икки баробар кичик. 1990 йилда Harrod’s дўкони учун бу каби машинадан уч дона ишлаб чиқарилган. Сотувга қўйилган автомобилни реставрация қилиш учун бир йилга яқин вақт кетган. Машина 5—9 ёшли болалар учун мўлжалланган.

Болалар «Testarossa»си ойна-пластикли кузов, газон текисловчи қурилманинг 200 кубли двигатели билан жиҳозланган. Шунингдек, автомобилнинг эшиклари очилади, фаралари ҳаракатланади, қурилмалари, жумалдан, спидометри тўлиқ ишлайди, рули эса ҳақиқий Ferrari спорткариники.

Автомобиль соатига 40 километр тезлик билан ҳаракатлана олади.

Ҳақиқий Ferrari Testarossa 1984—1991 йиллар оралиғида ишлаб чиқарилган. Спорткар 12 цилиндрли 390 от кучига эга двигатель ҳамда беш босқичли механик тезлик узатиш қутиси билан жиҳозланган. Автомобиль 100 километр/соат тезликка 5,8 сонияда чиққан. Максимал тезлиги эса  290 километр/соатга тенг бўлган.