Ўзбекистон Ёшлар иттифоқининг Фарғона водийсига йўл олган «Тарғибот поезди» Наманган вилоятига етиб келди. Бу ҳақда «Дарё»га ёш журналист Ҳумоюнмирзо Абдуллаев маълум қилди.
6 та вагондан иборат поездда жамоатчилик, илм-фан, маданият ва санъат вакиллари, шоир ва ёзувчилардан иборат 200 дан ортиқ киши Попда кутиб олинди ва шаҳар, туманларга йўл олди. «Фидойингиз бўлгаймиз сени, Ўзбекистон» шиори остидаги тадбирлар доирасида уюшмаган ёшлар билан очиқ мулоқотлар, мунозара ва мушоиралар, хайрия акциялари ўтказилиши кўзда тутилган.
Янгиқўрғон туман ҳокимлиги матбуот хизматига кўра, меҳмонлар, жумладан, қўшни Қирғизистон билан чегарада жойлашган Нанай қишлоғидаги «Кўксарой» дам олиш марказида бўлди. Дастлаб Нанай маданият ва аҳоли дам олиш маркази томонидан саҳна кўринишлари тақдим этилди.
Ўзбекистон Миллий университети доценти Аҳмаджон Мелибоев, Ёшлар Иттифоқи марказий кенгаши раис ўринбосари Суҳроб Мақсудов, шоир Чоршаъм Рўзиев, актриса Нигина Анорбоева, хонанда Музаффар Мирзараҳимов, психология ва бизнес бўйича мураббийлар йиғилганларнинг кўплаб саволларига жавоб берди, шеър ва қўшиқлар ижро этилди.
Намангандаги акциялар маданият ва санъат вакиллари иштирокидаги катта концерт дастури билан якунланиши кўзда тутилган.
Изоҳ (0)