Давлат божхона қўмитаси Ўзбекистонга мобил қурилмаларни ноқонуний равишда олиб киришга ҳаракат қилган бир нечта қонунбузарларни қўлга олди, бу ҳақда қўмита ахборот хизмати хабар берди.
«Тошкент-Аэро» ихтисослаштирилган божхона комплекси ходимлари пойтахт аэропортида Сеулдан учиб келган фуқаро И. Ҳакимовнинг қинғирликларини фош қилди. Унга тегишли юк жамадони белгиланган тартибда божхона кўригидан ўтказилганда, юклар орасидаги маиший техника буюмларининг тасвири назорат-рентган аппарати экранида шубҳали акс этган. Шундан сўнг, ушбу қурилмалар холислар иштирокида очиб кўрилганда, уларнинг орасига қиймати 3,7 миллион сўмлик 45 дона уяли телефонлар ҳамда улар учун мўлжалланган 32 дона батареялар моҳирлик билан яширилгани фош бўлди.
Фарғона туманининг қўшни давлат билан чегарадош ҳудудида ҳаракатланаётган нотаниш шахс ҳуқуқни муҳофаза қилувчи идора вакилларини кўриб қолгач, ёнидаги юкларини ташлаб жуфтакни ростлаб қолган. Қолдирилган юклар ўрнатилган тартибда ва холислар иштирокида кўздан кечирилганда, ушбу шахс қиймати 66 миллион сўмдан ортиқ бўлган, хорижда ишлаб чиқарилган 70 дона мобил телефонлар ҳамда 40 дона телевизион-тюнерларини яширинча олиб киришга урингани маълум бўлди.
Тошкент вилояти божхоначилари томонидан ҳам шу турдаги бир нечта қонунбузарлик ҳолатлари фош қилинди.
Хусусан, «Ғишткўприк» чегара-божхона комплексида пиёда равишда Ўзбекистонга кириб келган фуқаролар С. Султоналиев, Х. Маҳмудов ва Э. Маҳмудовлар божхоначиларни чалғитишга уриниб, кийимлари остидан белларига боғлаганча, 165 та муқаддам фойдаланилган қўл телефонларини олиб киришга уринишган пайтда тўхтатиб қолинди.
Хитойдан пойтахтда истиқомат қилувчи Ф. Кенжаева номига келтирилган яна бир почта жўнатмасида эса декларацияда қайд этилмаган 5 дона VM50 русумли кичик ҳажмдаги мобил телефонлар юборилганлиги маълум бўлди.
Бундай ихчам ва мўъжаз телефонлар йилнинг айни шу пайтида — 1 август тест имтиҳонлари олдидан Ўзбекистонга ноқонуний равишда кириб келиши авж олади.
Изоҳ (0)