Ўзбекистон Президенти ҳисобидан Ҳажга борадиган 73 нафар уруш фахрийсига биттадан қариндоши ҳамроҳлик қилади

Ўзбекистонлик 73 нафар Иккинчи жаҳон уруши фахрийси Ҳаж сафарига бориш тараддудини кўрмоқда. Бу ҳақда Ўзбекистон мусулмонлари идораси хабар бермоқда.

Ўзбекистон Президенти Шавкат Мирзиёевнинг 4 апрелдаги «Иккинчи жаҳон уруши қатнашчиларини рағбатлантириш тўғрисида»ги фармони ижроси юзасидан илгари Ҳаж зиёратига бормаган ёки бунга имкони бўлмаган уруш қатнашчилари Президент ажратган маблағ ҳисобидан зиёратга юборилиши белгилаб қўйилган эди.

Диний идора маълумотларига кўра, бу йил 73 нафар уруш қатнашчиси Ҳаж сафарига боради. Дин ишлари бўйича қўмита ва Ўзбекистон мусулмонлари идораси уруш қатнашчиларининг Ҳаж ибодатларини адо этиб қайтишлари учун шарт-шароитлар яратиш борасида иш олиб бормоқда.

Жумладан, уруш фахрийларининг оила аъзолари ёки яқин қариндошларидан бир нафарига навбатсиз Ҳаж зиёратига боришга рухсат берилган. «Айни пайтда нуронийларнинг қувончига шерик бўлиш ва дилдан суҳбатлашиш мақсадида уларнинг хонадонларига ташриф буюрилмоқда», — дейилади идора ахборотида.