Тошкент вилояти Пискент тумани марказида йирик иншоот, жоме масжиди қурилиб, намозхонлар ихтиёрига топширилди. Бу ҳақда Ўзбекистон мусулмонлари идорасининг расмий сайтида маълум қилинди.
2017 йилнинг 2 июли пискентликлар учун унутилмас кун бўлди. Масжиднинг тантанали очилиш маросимида Ўзбекистон мусулмонлари идораси Тошкент вилояти бош имом-хатиби Х.Турматов, Пискент туман ҳокими А.Акрамов, Пискент туман бош имом-хатиби ва Олмалиқ шаҳар бош имом-хатиби Х.Ортиқовлар сўзга чиқиб, намозхонларни бу қутлуғ даргоҳ, гўзал кошона, эътиқод маскани билан қутладилар, сўнгги йилларда мамлакатимизда дин эркинлиги соҳасида, намозхонларнинг ибодат қилиш шароитларини яхшилаш бўйича олиб борилаётган ишлар ҳақида алоҳида тўхталиб ўтишди.Масжид аҳли янги масжид биносида Тошкент вилояти бош имом-хатиби бошчилигида илк бора пешин намозини ўқидилар. «Пискент» жоме масжидида ибодат қилувчилар учун барча замонавий шароитлар яратилган. Намозхонларнинг яратилган шароитлар ва кўрсатилган эътибор сабаб қалблари хурсандчиликка тўлди.
Зайнилобиддинхон Қудратов, Пискент тумани бош имом хатиби
Масжид бирваракайига 2000 намозхонни сиғдириш имкониятига эга. Лойиҳага асосан ўта мустаҳкам тамал тоши устига пишиқ ғиштдан қурилган. Тўрт мезанали, гумбазли, ўта салобатли. Масжидни гумбази ўта чидамли металлдан — Олмалиқ металл заводида ясалган. Томи энг замонавий металл қоплама билан ёпилган. Shiftи гипсокартон билан қопланган, иситиш учун пенопласт тўшалган. Эшик ва деразаларига замонавий акфа ромлари ўрнатилган. Полга иситиш мосламаси ўрнатилган. Полга бир сидирға 1200 кв.метр гилам пояндоз тўшалган. Зина, ҳовли саҳни ва йўлкаларга кафел ва брусчаткалар ётқазилган. Таҳоратхона ва мустаҳабхоналар энг замонавий услубда жиҳозланган. Мўжазгина кутубхона ташкил этилган. Масжид саҳни обод, кўкаламзорлаштирилган. Манзарали дарахт ва гуллар экилган.
Изоҳ (0)