Ўзбекнефтгаз» миллий ҳолдинг компаниясининг тармоқ корхоналарида фаолият олиб борувчи ходимлар учун ташкил қилинган «Ёш мутахассислар» Форуми ўз ишини якунлади.
Шўртан газ-кимё мажмуасига қарашли «Лочин» оромгоҳида бўлиб ўтган форумда мамлакатдаги нефть ва газ соҳасида фаолият олиб бораётган ёш ходимлар ўзаро тажриба ва фикр алмашиш, янги ғоя ва ташаббуслар устида ишлаш имконига эга бўлди.
Форум доирасида ташкил этилган машғулотларда иштирокчилар 10 та гуруҳга бўлинган ҳолда Ҳаракатлар стратегияси, ёш мутахассисларнинг ижтимоий фаоллиги, халқаро ва миллий меҳнат стандартлари, ёш мутахассислар фаолиятида касаба уюшмаларининг ўрни каби мавзулар атрофидаги баҳс-мунозаралар ва муҳокамаларда, шунингдек, амалий машғулотларда қатнашди.
Шунингдек, ёш мутахассислар уч авлод учрашувида иштирок этди. Учрашувда соҳада узоқ йиллар меҳнат қилган фахрийлар ва академиклар ёшлар билан мулоқот қилиб, уларнинг ташаббуслари ва лойиҳалари билан танишди ҳамда бу ташаббусларни ривожлантириш учун йўл-йўриқлар кўрсатди.
Тармоқ корхоналари ходимлари томонидан ўз корхоналари ҳақида қилинган тақдимотларда олдинга сурилаётган ташаббуслар ва амалга оширилаётган лойиҳалар ҳақида сўз борди.
Шу билан бирга, гуруҳлар ўртасида спорт мусобақалари ва «Заковат» интеллектуал ўйини ташкил этилди.
Форумнинг ёпилиш маросимида фаол иштирокчилар, спорт ва интеллектуал мусобақаларда ғолиб бўлган гуруҳлар тақдирланди.
Изоҳ (0)