Туризм қурбонлари: Таиландда ҳар йили 3 мингга яқин гиббон ўлдирилади
Жануби-Шарқий Осиё давлатлари, хусусан, Таиландда гиббонлар сайёҳларни жалб этиш воситаси бўлиб хизмат қилади. Бундай фаолият ноқонуний бўлишига қарамай, пляжларда сайёҳларга арзимаган ҳақ эвазига маймун билан суратга тушиш таклифига бот-бот дуч келиш мумкин. Бу ҳақда National Geographic хабар бермоқда.
Пхукет оролидаги гиббонларни реабилитация қилиш лойиҳаси раҳбарининг ўринбосари Тимп-парат Мингпайнга кўра, тай овчилари ҳар йили 3 мингга яқин жониворни йўқ қилади. Браконьерлар гиббон болалари онаси билан бир йилгача яшашидан фойдаланади ва ов давомида айнан урғочини нишонга олади.
«Одатда овчилар битта болани қўлга киритиш учун маймунларнинг камида учта оиласини йўқ қилади. Катталарини чақалоқларни ҳимоя қилмоқчи бўлганида ўлдиришади, болалар эса дарахтдан қулаб, ҳалок бўлади», — дея ҳикоя қилади Мингпайн.
Эгалари гиббонлардан 4—5 ёшгача фойдаланади. Бу ёшда уларнинг қозиқтишлари чиқади, тажовузкор бўлиб қолади ва сайёҳларни чўчитади. Бундай гиббонлар одатда ўлдирилади ёки кўчага улоқтирилади.
