Тошкент вилоятининг Ангрен шаҳрида содир этилган талончилик жинояти ички ишлар органлари ходимларининг тезкор ҳаракатлари натижасида фош этилиб, гумондорлар қўлга олинди. Бу ҳақда вилоят ИИБ хабар берди.
Фуқаро Б. А. 2017 йил 25 июнь соат тахминан 01:30 да, ўзганинг мол-мулкини яширин равишда талон-тарож қилиш мақсадида, акаси Д. А. ва таниши А. С. билан олдиндан жиноий тил бириктириб, Ангрен шаҳар Кўктерак маҳалласидаги хонадонга Д. А. билан девордан ошиб кирган.
Ака-ука хонадон ётоқхонаси ва меҳмонхонасидан фуқаро Л. I.га тегишли бўлган нархи 1 500 000 сўмлик Samsung русумли планшет, нархи 2 000 000 сўмлик iPhone 4, нархи 3 000 000 сўмлик iPhone 5S русумли уяли алоқа телефонлари, нархи 700 000 сўмлик тилла узук, нархи 700 000 сўмлик бир жуфт тилла сирға ҳамда 80 000 сўм нақд пулни қўлга киритган. Уй эгасининг уйғониб кетганлиги сабабли улар жиноят жойидан қочиб кетган.
Олиб борилган суриштирув ишлари натижасида А. С. 2017 йил 24 июнь куни эрталаб, ака-укалар Б. ва Д. А.нинг уйига келган ва уларга пулдан қийналаётганлигини айтган. Суҳбат давомида А. С. ўзи яшайдиган Кўктерак маҳалласида яшовчи бир шифокор борлиги, у ҳар куни уйида беморларни қабул қилиши, пули кўплиги, уйда фақат эр-хотин яшаши, бошқа ҳеч ким яшамаслиги, тунда уларни уйига кириб пулларини ўғирлаб чиқиш мумкинлиги, уй эгалари буни сезмаслигини айтиб, бу ишни бирга амалга оширишни таклиф қилган. Шерикларини жиноят содир этишга қизиқтирган А. С. уларга хонадонни кўрсатиб, хонадонга қандай кириш мумкинлиги ҳақида аниқ маълумот берган.
Дастлабки тергов ҳаракатлари давомида тўпланган ҳужжатларга кўра, 1987 йилда туғилган Б.А. муқаддам қасддан баданга оғир шикаст етказиш, босқинчилик, талончилик каби оғир жиноятларни содир этганлиги боис жавобгарликка тортилган.
Ҳозирги вақтда ушбу шахсларга нисбатан Ўзбекистон Республикаси Жиноят Кодексининг тегишли моддаларига асосан жиноят иши қўзғатилиб, тергов ҳаракатлари олиб борилмоқда.
Изоҳ (0)