Рио—2016 нинг ўзбекистонлик 7 совриндори Лондондаги Жаҳон чемпионатига жўнаб кетди

14 июль куни Лондонда паралимпия енгил атлетикаси бўйича Жаҳон чемпионати старт олади, деб «Дарё»га маълум қилди Ўзбекистон миллий паралимпия ассоциацияси матбуот хизмати. Мундиал беллашувлари 23 июлга қадар давом этади.

Жаҳон чемпионатида Ўзбекистон шарафини Рио—2016 Паралимпиадасида совриндор бўлган етти нафар спортчи ҳимоя қилади. Улар кеча — 11 июль куни Лондонга жўнаб кетган.

Енгил атлетиканинг диск ва ядро улоқтириш беллашувларида Рио—2016 рекордчиси, Паралимпиада чемпиони Хуснуддин Норбеков, найза отишда Рио—2016 ҳамда Бокудаги «Ислом бирдамлиги ўйинлари» рекордчиси ва чемпиони Александр Свечников Ўзбекистон байроғи остида чиқиб келади.

Шунингдек, 100 ва 200 метрга югуришда Мансур Абдурашидов, 400 ва 1500 метрга югуришда Инчеон—2014 Параосиё ўйинларида 2 та олтин медаль олган Маъруфжон Муродуллаев, узунликга сакрашда Баку—2017 чемпиони Дониёр Солиев куч синашади.

Жаҳон чемпионатида ўзбекистонлик аёл спортчилар икки нафарни ташкил қилади. Ядро улоқтиришда Рио—2016 да кумуш медални қўлга киритган София Бурхонова, найза отишда эса Рио—2016 рекордчиси ва олтин медали соҳибаси Нозимахон Қаюмова бош соврин учун кураш олиб боради.

Лондондаги турнир 10 кун давом этиб, 1300 спортчи 213 та медаллар шодаси учун рақобатлашади.