Сеул Пхеньян билан ҳарбий масалалар, жумладан, чегарадаги ҳарбий ҳаракатларни тўхтатиш бўйича музокараларга тайёр. Бу ҳақда Жанубий Корея президенти Мун Чжэ Ин маълум қилди, дея хабар беради «РБК».
Шунингдек, Жанубий Корея КХДРга оилаларнинг бирлашиши бўйича чораларни, икки давлат чегарада овозкучайтиргичлар орқали олиб бораётган тарғибот эшиттиришларини ўзаро тўхтатишни таклиф этиш ниятида.
«Ҳукумат президентнинг таклифларини рўёбга чиқариш устида ишламоқда. Биз Сеулнинг Корея ярим оролида тинчликни таъминлашга қаратилган таклифларига Пхеньян ижобий жавоб беришини кутмоқдамиз. Ҳарбий музокаралар режаси ҳукумат томонидан кўриб чиқилмоқда, унинг тафсилотлари яқин орада эълон қилинади», — деди Жанубий Корея бирлашиш ишлари вазирлиги вакили Ли Южин.
Эслатиб ўтамиз, Жанубий Корея президенти Мун Чжэ Ин Шимолий Корея етакчиси Ким Чен Ин билан хоҳлаган вақтда ва хоҳлаган жойда мос шартлар асосида учрашишга тайёр эканлигини маълум қилганди.