15 йил аввал «Пахтакор»ни Осиёда энг яхши қилган футболчилар ҳақида. Улар ҳозир қаерда?

2002 йил ОФК Тошкентнинг «Пахтакор» клубини қитъанинг энг яхши жамоаси деб эътироф этганди. Ушбу воқеага ҳам 15 йил тўлди, деб ёзганди «Championat.asia» нашри. Мақола муаллифи Нарзулла Сайдуллаев «Пахтакор»ни Осиёда энг яхши қила олган футболчилар ҳозирги кунда нималар билан машғул эканига эътибор қаратган.

«Пахтакор» янги раҳбарият қўлига ўтгач, унинг суперклубга айланиши борасида гапирилди. Бу йўлда клуб академияси кучайтирилади, стадион қайтадан қурилади ва жамоага бир қатор кучли футболчилар таклиф қилинади. Савол: клуб юқорида айтилгани каби мавқесини қайтара оладими? Қуйида «Пахтакор»да меҳнат қилган футболчилар бугунига назар солинади.

Кўпчилик учун ОФК нимага айнан ўзбек клубини энг яхши деб топгани қизиқ. Ўша йил Осиё футболи раҳбарлари «Осиё чемпионлар кубоги»ни «Осиё чемпионлар лигаси» деб ўзгартирди ва мусобақа янги форматда ўтказила бошланди. Ўзбекистон вице-чемпиони сифатида турнирга плей-оффдан қўшилган «шерлар» Иорданиянинг «Ал-Виҳдат» (3:0, 1:3), Қатарнинг «Ал-Иттиҳод» (3:4, 3:0) ва БААнинг «Ал-Аҳли» (3:2, 1:0) клублари тўсиғидан муваффақиятли ўта олди. Гуруҳ босқичини 2003 йилнинг баҳорида ўтказиш режалаштирилганди. Шу тариқа ОФК саралашда ажойиб ўйинлар намойиш этгани учун «Пахтакор»ни қитъанинг энг яхши клуби сифатида тан олганди.

Жамоа ўша йил Виктор Жалилов бошқарувида Ўзбекистон чемпионатида 74 очко тўплади ва чемпион бўлди. Ўзбекистон кубогининг финалида эса Фарғонанинг «Нефтчи» клуби 6:3 ҳисобида таслим қилинди.

Игнатий Нестеров

Ўша йил жамоага келган ёш посбон тезда асосий дарвозабонга айланиб олганди. Нестеров «Пахтакор»нинг бир неча йил давомида Ўзбекистонда гегемонлик қилишига салмоқли ҳисса қўшди. Кейин у бир неча йил давомида «Бунёдкор»да ўйнади. Айни пайтда эса Тошкентнинг учинчи гранд клуби «Локомотив» шарафини ҳимоя қилмоқда. Нестеров бу вақт ичида Ўзбекистон термасининг 100 га яқин ўйинида майдонга тушишга муваффақ бўлди.

Гочкули Гочкулиев

Туркманистонлик ҳимоячини «Пахтакор»нинг энг яхши легионерларидан бири деб бемалол айтиш мумкин. У орқа чизиқда тўп сурса ҳам, рақиб дарвозасига гол уришда унча-бунча ҳужумчига дарс берган. Гочкулиев 2002 йил Олий лиганинг 26 та учрашувида 14 та гол уриб, клуб тўпурари бўлганди.

Ҳимоячи 2002—2005 йилларда «Пахтакор» шарафини ҳимоя қилган. 2007—2010 йиллар давомида «Бунёдкор»да ўйнаган. У 2014 йилдан буён «Олтин Аср» клубида катта мураббий лавозимида ишлаб келмоқда.

Гочкулиев Ўзбекистондаги фаолияти давомида 7 карра Ўзбекистон чемпиони, 6 карра Ўзбекистон кубоги соҳиби бўлди. 3 марта ОЧЛ ярим финалига қадар етиб борди. 2002 йилда Ўзбекистоннинг энг яхши футболчиси сўровномасида Александр Гейнрихдан кейинги иккинчи бўлганди.

Бахтиёр Ашурматов

Ўша мавсум ҳимоя марказида Гочкулиев билан тандем ҳосил қилган Ашурматов жамоа ғалабаларига ўз ҳиссасини қўша олган. Кейинроқ у маълум муддат Россиянинг «Спартак Алания», «Торпедо Металлург», «Криля Советов» клублари шарафини ҳимоя қилди. 2007 йил Олий лигага катта мақсадлар билан чиққан «Қурувчи» (ҳозирги «Бунёдкор») тажрибали ҳимоячини Ўзбекистонга қайтарди. Икки йил давомида «қалдирғочлар» сафида ўйнаган Ашурматов, футболчилик фаолиятининг сўнгги йилларини «Хоразм» ва «Локомотив»да ўтказди.

2012 йилдан мураббийлик фаолиятини бошлаган собиқ ҳимоячи дастлаб «Гулистон», сўнгра «Навбаҳор» ва «Андижон» клубларида ишлади. Бир муддат Ўзбекистон олимпия термасини ҳам бошқарди. Ҳозир «Бухоро» клубида Улуғбек Бақоев билан бирга фаолият олиб бормоқда.

Виталий Жалилов

Виктор Жалиловнинг ўғли қанот ҳимоясида ўйнарди. Керак пайтда ҳужумга ҳам қўшилиб, шерикларини голли вазиятга олиб чиқишга ҳаракат қиларди. 2003 йилда «Пахтакор»дан кетган Жалилов, фаолиятини «Навбаҳор», «Машъал» ва «Қизилқум» клубларида давом эттирди. 2007 йил бутсаларини михга илган Виталий айни пайтда Самвел Бабаян жамоасида маъмур сифатида фаолият олиб бормоқда.

Қайрат Ўтабоев

Ўзбекистонда туғилган қозоқ футболчиси 2000—2003 йилларда «Пахтакор» шарафини ҳимоя қилган ва қанот ҳимоясида ўйнаган. «Шерлар» сафини тарк этгач, Қозоғистонинг бир қатор клубларида ўйнади. 2009 йил Ўзбекистонга қайтиб, «Андижон»да тўп сурди.

Ўтабоев 2012 йил фаолиятини тугатганди. Эътиборлиси, Қайрат 2002 йил Ўзбекистон терма жамоасида майдонга тушган. 2005—2007 йилларда эса Қозоғистон терма жамоасида ўйнаган.

Владислав Кирьян

Мавсумни ўнг қанот ҳимоя ва ярим ҳимоясида ўтказган футболчи, ўша йил Олий лигада 20 та ўйин ўтказиб, 3 та тўп киритганди. 2009 йилда Кирян Наманганинг «Навбаҳор» клубига кўчиб ўтди. 2010 йилнинг иккинчи даврасида Тошкентнинг «Локомотив» клубида кўриниш берди ва шундан сўнг катта спорт билан хайрлашди. У айни пайтда Россиянинг Белгород вилоятида яшайди, бизнес билан шуғулланади.

Анвар Ғофуров

Футболдаги фаолиятининг илк йилларини «Пахтакор»да бошлаган Ғофуров ҳозирга қадар футбол ўйнамоқда. «Шерлар» сафини 2003 йил тарк этган футболчи, кейинроқ «Навбаҳор», «Динамо», «Машъал» ва «Бунёдкор» клубларида ўйнади. Ҳозир эса тарқалиб кетиш арафасида турган Тошкентнинг «Обод» клубига ўйнамоқда.

Сервер Жепаров

«Пахтакор»нинг асосий ўйинчиларидан бири бўлган Жепаров плеймейкер сифатида Осиёга машҳур бўлиб улгурганди. Бундан ташқари Сервер кўплаб голлар уришга ҳам муваффақ бўлганди. 2007 йилга қадар «шерлар» сафида бир қатор совринларни қўлга киритган ярим ҳимоячи, 2008 йил «Бунёдкор»га ўтганди.

Осиёда икки марта йилнинг энг яхши футболчиси деб тан олинган Жепаров Саудия Арабистони, Жанубий Корея клубларида фаолият олиб борди ва ҳар икки мамлакат чемпионига айланди. У ўтган йил «Локомотив»да ўйнади, бу йил бошида эса Эронинг «Истиқлол» клуби билан бир ярим йиллик шартнома тузди ва «Сепахон»га ижарага берилди.

Леонид Кошелев

Чап оёғидаги зарбаси рақиб дарвозабонларининг тушларига кириб чиқарди. Унинг жарима тўпларидан урган голлари «Пахтакор»нинг бир қатор муҳим ғалабаларига замин яратди. Кошелев «шерлар» сафини 2007 йилда тарк этган. Шундан кейин «Динамо», «Қизилқум», «Шўртан» ва «Навбаҳор» каби клубларда ўйнади. 2013 йил футболчилик фаолиятини тугатган Кошелев айни пайтда «Пахтакор» академиясида ёш болакайларга футбол сир асрорларини ўргатиб келмоқда.

Тимур Кападзе

Бугунги кунга қадар футбол ўйнаётган кам сонли ўйинчилардан яна бири. Кападзе ўша таркибда универсал футболчи эди. «Нефтчи»да ҳужумчи бўлган Копа, «Пахтакор»да таянч зонада ўйнади. Ўша йил олий лигада 20 та учрашув ўтказиб, 4 та гол уришга эришган Кападзе ҳам Жепаров каби 2008 йилда «Бунёдкор»га кўчиб ўтганди. Бундан ташқари Жанубий Корея ва БАА чемпионатларида ўйнаган ярим ҳимоячи, бугунги кунда «Локомотив» шарафини ҳимоя қилмоқда.

Миржалол Қосимов

Ўзбекистонинг энг кучли футболчиларидан бири бўлган Миржалол Қосимов ўша мавсум жароҳатлари туфайли бир қатор ўйинларда жамоага ёрдам бера олмади. Аммо майдонга тушган ўйинларининг ҳеч бирида рақибларга осон бўлмасди. Жарима тўпларидан заргарона голлар уришнинг ҳадисини олган Қосимов, майдонни кўриш ва чиройли тўп узатишда ҳам шеркиларига дарс берарди.

Қосимов 2003—2004 йилларда Россиянинг «Алания» клубида, 2005 йил Муборакнинг «Машъал» клубида ўйнаб, фаолиятини якунлашга қарор қилди. Қосимов бутсаларини михга илиб, мураббийлик фаолиятини бошлаб юборганди. Ўзбекистон олимпия терма жамоасида ёрдамчи мураббий бўлган Миржалол Қўшоқович, «Бунёдкор» бош мураббийи сифатида икки йил ишлади. Кейин Ўзбекистон терма жамоаси бош мураббийи сифатида фаолият олиб борди.

У ҳам футболчи, ҳам мураббий сифатида Осиё Чемпионлар лигасининг ярим финалига қадар етиб борган инсон ҳисобланади. «Бунёдкор» клубини 2008 ва 2012 йилларда айнан Қосимов қитъа чемпионатида ярим финал сари бошлаганди.

Александр Гейнрих

18 ёшли ҳужумчи «Пахтакор»даги илк мавсумидаёқ ажойиб ўйинлар намойиш этиб берганди. Йил якунида Ўзбекистонинг энг яхши футболчиси деб топилгани ҳам бунга исбот бўла олади. Олий лигада 22 та ўйинда майдонга тушган ва 9 бор рақиблар дарвозасини ишғол қилган Саша, фаолиятининг кейнги йилини Россиянинг «ЦСКА» клуби билан боғлаб, хато қилганди. Ёш футболчи кучли рақобатда ютқазди ва асосий таркибда майдонга деярли тушмади. Кейин «Пахтакор»га қайтиб, ўз формасини тиклаб олгач, яна Россияга, бу сафар Москванинг «Торпедо» клубига ўтди.

2007—2011 йилларда «Пахтакор»да ўйнаган Гейнрих Қатардаги Осиё кубогидан сўнг Жанубий Кореянинг «Сувон Самсунг» клубидан тушган таклифни қабул қилганди. Сўнгра, БААда «Эмирейц», Қозоғистонда «Актобе» клубларида ўйнади. 2014 йилни «Локомотив»да ўтказди. Саша 2015 йилдан буён Қозоғистонинг «Ордабаси» жамоаси шарафини ҳимоя қилиб келмоқда.

Зайниддин Тожиев

Ҳужумчи ўша йил Олий лигада 16 та учрашувда майдонга тушиб, 3 та гол урди. ОЧЛ плей-оффида эса Тожиевларнинг тўнғичи «Ал-Виҳдат», «Ал-Иттиҳод» ва «Ал-Аҳли» билан ўйинларда жами 4 та гол уришга муваффақ бўлди. Унинг дриблинги рақиб ҳимоячиларини шошириб қўярди.

2010 йилга қадар «Пахтакор»да ўйнаган ҳужумчи, фаолиятини Олий лиганинг бир қатор клубларида давом эттирди. 2015 йил «Бухоро» сафида бир давра ўйнаб, бутсаларини михга илишга қарор қилди. Тожиев айни пайтда JFL Tashkent клубида болалар мураббийи бўлиб ишламоқда.

Анвар Солиев

«Сеҳрли таёқча» сифатида ном қозонган ҳужумчи «Пахтакор»да ўша мавсум кўпинча қанотда кўриниш берди ва муҳим голларни урди. Солиев 2008 йил «Бунёдкор»ни танлади ва 2012 йилга қадар шу жамоада ўйнади. Орада бир йил «Насаф»да ижарада ўйнаб қайтди.

2013—2015 йилларда яна «шерлар» сафига қайтган ҳужумчи, ўтган мавсум биринчи даврадан сўнг футболчиликни тугатишга қарор қилди. Бугунги кунда Наманганинг «Навбаҳор» клубида спорт директори лавозимида фаолият олиб бормоқда.

Неъматулла Қуттибоев

Қорақалпоғистонлик ҳужумчи ўша йил Олий лигада 25 та учрашувда майдонга тушиб, 9 та гол уришга муваффақ бўлганди. Қуттибоев ҳужумда Гейнрих билан тандем ҳосил қиларди. «Пахтакор»дан сўнг у «Қизилқум» ва «Хоразм» сафида ўйнади. Бир неча йил давомида «Орол» клуби бош мураббийи лавозимида фаолият олиб борди. Бугунги кунда Қуттибоев Нукус олимпия захиралари коллежида ёш футболчиларга сабоқ беради.

Марат Бикмаев

Ўша таркибнинг энг ёш вакилларидан бири. Бикмаев 16 ёшида Олий лигада 7 та учрашувда майдонга тушиб, 1 та гол уришга эришганди. У «Пахтакор»дан кейин асосан Россия клубларида ўйнади: «Криля Советов», «Рубин», «Спартак Нальчик», «Алания». Марат Қозоғистонда «Актобе»да икки мавсум тўп сурди. 2014 йилда Ўзбекистонга қайтиб, «Локомотив» билан шартнома тузди. Бугунга келиб жамоанинг асосий ҳужумчисига айланиб олган.

Виктор Жалилов

«Пахтакор»нинг ўша вақтдаги ғалабалари Виктор Жалилов билан боғланади. Бош мураббий клубни Ўзбекистон чемпиони ва мамлакат кубоги соҳибига айлантирганди. Шу сабабли 2002 йил айнан Виктор Романович Ўзбекистоннинг энг яхши мураббийи деб эътироф этилган. «Пахтакор»дан кейин Жалилов «Машъал», «Навбаҳор» ва «Динамо» клубларида ишлади. Айни пайтда Ўзбекистон терма жамоаси мураббийлар штабида фаолият олиб боради.