Тошкентда афсонавий Nokia 3310 сотувга чиқди

Тошкентда машҳур «ғишт» — Nokia 3310 телефони ремейки сотуви бошланди. Бу ҳақда «Mobinfo.uz» хабар бермоқда.

Яқинда MWC 2017 кўргазмасида тақдим этилган Nokia 3310 афсонавий ўтмишдошига дизайни жиҳатидан ўхшаш, холос. Қурилманинг вазни, қалинлиги ва тугмалари ўлчами ўзгарган.

Аккумулятор сиғими 1200 мА/соат, батарея эса олинади. Ишлаб чиқарувчига кўра, қувватлантирилганидан сўнг 22 соат гаплашиш мумкин, «кутиш» тартибида эса бир ойга етади.

Қурилма 2 мегапикселли камера, рангли экран, икки баробар кенгайтирилиши мумкин бўлган 16 мегабайт хотирага эга. Гаджетни ФМ-радио ва MP3-плеер сифатида ишлатиш мумкин.

4 хил рангдаги вариантлари бўлган қурилма пойтахт бозорларида 900 минг сўмдан таклиф этилмоқда. Таққослаш учун, бу суммага Жанубий Корея ва Хитой фирмаларининг арзон смартфонларини харид қилиш мумкин.

Қурилманинг кўрсатилган нархда сотиб олишга «Дарё» нашри кафолат бермайди. Қурилма ва унинг нархи ҳақидаги ахборот фақат танишиш учун тақдим этилган.