Англия ёшлар терма жамоаси тарихда илк бор жаҳон чемпионлигини қўлга киритди

Жанубий Корея мезбонлик қилган футбол бўйича ёшлар ўртасидаги Жаҳон чемпионатида Англия термаси ғолиб чиқди.

Инглизлар ҳал қилувчи финал ўйинида Венесуэлага қарши саф тортди ва Калверт-Левиннинг 35-дақиқада урган ягона голи эвазига муваффақият қозонди.

Англия ёшлар терма жамоаси гуруҳда Аргентинани 3:0, мезбон Жанубий Кореяни 1:0 ҳисобида мағлуб этган, Гвинея билан эса 1:1 ҳисобида дуранг ўйнаганди. Финалгача улар Коста-Рикани 2:1, Мексикани 1:0 ва ярим финалда Италияни 3:1 ҳисобида таслим қилишга муваффақ бўлди.

Бунга қадар Англия ёшлар терма жамоаси ҳатто финалга ҳам етиб келмаганди. 1993 йил Жаҳон чемпионатини 3-ўринда якунлаган инглиз ёшлари, 1981 йилда 4-ўрин билан чекланганди. 2017 йил улар мамлакат тарихида янги саҳифа очди.

Пол Симпсон мураббийлик қилган Англия ёшлар терма жамоасида «Эвертон»нинг 5, «Челси»нинг 3, «Ньюкасл», «Тоттенҳэм», «Мидлсбро», «Ливерпуль» каби клубларнинг 2 нафардан, шунингдек, «Борнмут», «Арсенал», «Брентфорд», «Манчестер Юнайтед», «Ридинг» каби клубларнинг бир нафардан тарбияланувчиси бор эди.

Ёшлар ўртасидаги мундиалда энг кўп Аргентина ғолиб чиқан — 6 марта. Бразилияда кубоклар сони 5 тани ташкил қилади. Европаликлардан Португалия ва Сербия термаларига 2 мартадан жаҳонда тенгсиз бўлиш насиб қилган.