Аргентина ва Бразилия терма жамоалари Австралияда ўзаро ўртоқлик учрашуви ўтказди. Унга Мельбурн шаҳридаги Cricket Ground аренаси мезбонлик қилди.
Беллашувда Лионель Месси етакчилигидаги Аргентина терма жамоаси 1:0 ҳисобида зафар қучди. Ўйиндаги ягона гол биринчи бўлим сўнггида «Севилья» футболчиси Габриэл Меркадо томонидан урилди.
Бир неча соат аввал якунига етган ўйинда Бразилиянинг етакчи футболчиси Неймар ҳаракат қилмади. Месси эса тўлиқ — 90 дақиқа майдонда тўп сурди.
Бразилия терма жамоаси ЖЧ—2018 саралашни кўтаринки руҳда ўтказиб, Россия мундиали учун чиптани ҳаммадан илгари ютиб бўлганди. Аргентина терма жамоаси эса саралаш турнирида Бразилия, Колумбия, Уругвай ва Чилидан кейин бешинчи жамоа бўлиб турибди. Бу ўрин фақатгина қитъалараро плей-оффга йўлланма бериши мумкин. Аргентина вазиятдан чиқиб кетиши учун олдинда яна тўрт тур ўйинлари бор.
Қайд этиш керак, Аргентина ва Бразилия термалари саралашдаги ҳар икки ўйинда ҳам майдонга тушиб бўлган. Томонларнинг Буэнос Айресдаги ўйинида 1:1 ҳисоби қайд этилган бўлса, жавоб ўйинида Бразилия йирик — 3:0 ҳисобида зафар қучган. Голлар Коутинё, Неймар ҳамда Паулинё томонидан урилганди.
Ўртоқлик учрашуви Мельбурн, Австралия 9 июнь, жума
Аргентина — Бразилия 1:0
Гол: Габриэль Меркадо, 45 (1:0).Аргентина: Серхио Ромеро — Николас Отаменди, Хонатан Маидана, Габриэль Меркадо (Эрнан Маммана, 75), Алеҳандро Гомес (Николас Тальяфико, 52), Лукас Билья, Эвер Банега (Мануэль Лансини, 81), Лионель Месси, Пауло Дибала (Рикардо Родригес, 69), Анҳел Ди Мария, Гонсало Игуаин (Анҳел Корреа, 46).
Бразилия: Вевертон — Фагнер Лемос (Рафинья, 73), Тьяго Силва, Карлес Жил, Филипе Луис, Фернандиньо, Паулиньо (Жулиано, 81), Ренато Аугусто (Дуглас Коста, 66), Фелиппе Коутиньо, Габриэль Жезус (Тайсон, 90), Виллиан.
Изоҳ (0)