Кобулдаги терактдан сўнг Афғонистонда 11 нафар жангари қатл этиладиган бўлди

Кобулдаги 90 кишининг умрига зомин бўлган терактдан сўнг, Афғонистон президенти Ашраф Ғани «Толибон» радикал ҳаракати ва «Ҳаққоний тармоғи» террорчилик гуруҳига алоқадор 11 жангарига нисбатан ўлим жазосини ижро этиш ҳақида кўрсатма берди. Бу ҳақда «ТАСС» хабар бермоқда.

Маҳаллий Tolo News телеканали ахборотига кўра, Афғонистон президенти томонидан имзоланган фармойишда экстремистик ташкилотларининг таниқли дала қўмондонлари бор.

Айни вақтда, ўлим жазосига ҳукм қилинганлар орасида «Ҳаққоний тармоғи» асосчиси Жалолиддин Ҳаққонийнинг ўғли ва тармоқнинг ҳозирги раҳбари Сирожиддин Ҳаққонийнинг укаси Анас Ҳаққоний исми йўқ.

Кобулдаги теракт 31 май, чоршанба куни тонгда юз берди. Миналаштирилган автотцистерна дипломатик даҳага олиб борувчи назорат-ўтказиш жойида портлатиб юборилган.

Ҳодиса оқибатида 90 киши ҳалок бўлди, 380 киши турли даражада тан жароҳати олган. Теракт учун жавобгарликни ИШИД террорчилик ташкилоти ўз зиммасига олган.

Бироқ кейинроқ Афғонистон Миллий хавфсизлик директорати теракт «Ҳаққоний тармоғи» томонидан Покистон идоралараро разведкаси билан мувофиқликда ташкил этилгани ҳақида баёнот берди.

«Ҳаққоний тармоғи» Покистоннинг Шимолий Вазиристон вилоятида ўрнашган бўлиб, Афғонистоннинг ҳозирги раҳбариятига қарши кураш олиб боради.