Малика Диана ҳалокатга учраган Mercedes автомобили бунгача ҳам йўл-транспорт ҳодисалари иштирокчиси бўлган ва кейинчалик қайта тикланган. Бу ҳақда Франциянинг М6 телеканали орқали намойиш этилган «Диананинг ҳалокати: ақл бовар қилмас далиллар» фильмида маълум қилинди, дея хабар беради «РИА Новости».
Фильм ижодкорларига кўра, машинанинг илк эгаси ёш рекламачи Эрик Буске бўлган. У янги Mercedes’ни 1994 йил сентябрида харид қилганди. Орадан бир неча ой ўтиб, машинани ўғирлаб кетилади. Автомобиль ўғриси Париж яқинида тезликни жуда юқорига кўтаради, бироқ бошқарувни уддалай олмай, машинани дабдала қилади.
Mercedes тиклаб бўлмас ҳолга келган, уни чиқитга чиқариш талаб этиларди, бироқ нимадир сабаб билан бундай бўлмади. Буске суғурта компаниясидан товон пули олди.
Mercedes’нинг кейинги эгаси Парижнинг Ritz меҳмонхонаси бадавлат мижозларини ташиш учун қимматбаҳо машиналар тақдим этадиган Etoile Limousines компанияси бўлди. Меҳмонхона эгаси Диананинг дўсти Доди ал-Файеднинг отаси Муҳаммад ал-Файед эди.
Бу ерда автомобиль яна бир маротаба ўғирлаб кетилади ва уни икки ой мобайнида топиб бўлмайди. Кейинчалик машина трасса четидан топилди, бироқ унинг жиҳозлари бир қисми йўқ, электроникаси шикастланганди.
Малика Диана, Доди ал-Файед ва тансоқчи бўлган автомобиль 1997 йил 31 августда охирги йўлга айнан Ritz автотураргоҳидан жўнаганди. Туннелдан Mercedes’дан қолган нарсалар икки контейнерда олиб кетилди: бирида шасси, иккинчисида эса қолган барча қисмлар тўпланганди.
Расмий тергов натижаларига кўра, аварияга ҳайдовчи Анри Пол автомобилни маст ҳолатда бошқаргани асосий сабаб бўлди.
Изоҳ (0)