Қозоғистонда Ravon Nexia R3 моделини серияли ишлаб чиқариш бошланди
GM Uzbekistan АЖ Қозоғистон Республикасининг AllurGroup миллий автотранспорт воситаларини ишлаб чиқарувчи компанияси билан ҳамкорликда Костанай шаҳридаги «СариаркаАвтоПром» ишлаб чиқариш майдонида Ravon Nexia R3 моделини серияли ишлаб чиқаришга киришди, деб ёзади «1news.uz» Қозоғистон компанияси матбуот хизматига таяниб.
Аввалроқ GM Uzbekistan ва «СариаркаАвтоПром» Қозоғистон-Ўзбекистон бизнес-форуми доирасида лойиҳани амалга ошириш якуний босқичда турганини маълум қилган эди. General Motors Korea компанияси мутахассислари «СариаркаАвтоПром»да ўтказган аудит хулосасига кўра, ишлаб чиқариш майдони талаб этиладиган сифат стандартларининг барчасига мувофиқ келади.
Ravon Nexia R3 седани заводнинг мавжуд корхоналарида чиқарилади. Ҳамкорликнинг кейинги босқичи ишлаб чиқарилаётган автомобиллар линейкасини кенгайтиришдан иборат бўлиши мумкин.
