Rolls-Royce компанияси ўзини ошкор қилишни истамаган мижозга Sweptail маркасидаги автомобилни ягона нусхада ишлаб чиқарди. Ушбу марка раҳбари Торстен Мюллер-Отвоснинг сўзларига кўра бу машина дунёдаги энг қиммат автомобиль ҳисобланади. Бу ҳақда Cаr нашрига таяниб, «Мотор» хабар берди.
Янги автомобиль дизайни Phantom услубида ишланган. Шу билан бирга машина кузовининг олд қисми бутунлай ўзгартирилди ва орқа қисми мутлақо янгича кўриниш касб этди. Rolls-Royce’дагиларнинг таъкидлашича, дизайнерлар автмобилни ишлаб чиқаришда буюртмачининг илтимосига биноан замонавий яхталардан илҳом олган.
Rolls-Royce Sweptail’нинг ички қисмида иккитагина ўриндиқ жойлашган. Салон ичи табиий чарм ва ёғочдан ишланган. Автомобильда бош кийимларни, шунингдек, қўлда тайёрланган чарм портфелларни сақлаш учун орқа қисмига махсус бўлмалар ўрнатилган. Улар ҳам Sweptail юкхона жамланмаси каби ушбу автомобиль учун махсус тайёрланган.
Бундан ташқари машинанинг марказий консолида шампан бутилкаси ва иккита биллур фужер сақлаш учун бўлма жойлашган.
Rolls-Royce Sweptail’нинг бошқа ҳеч қандай техник тавсифини келтирилмади.
Изоҳ (0)