GM Uzbekistan Malibu’нинг янгиланган моделини йиғишни бошлади. Характеристика ва фото

GM Uzbekistan АЖ Chevrolet Malibu седанининг янгиланган моделини йиғишни бошлади. Бу ҳақда «Ўзавтосаноат» АК хабар берди.

Янги русумдаги Chevrolet Malibu бир қатор афзалликларга эга. Аввалги авлод вакилларига нисбатан хавфсизлик ва қулайлик кўрсаткичлари такомиллашган, анчагина тежамкор ҳамда технологик модель.

Автомобиль GM Uzbekistan АЖнинг Тошкентдаги филиалида йирик блокли йиғиш усулида (SKD) ишлаб чиқарилади.

Дизайнерлар Chevrolet Malibu янги авлод модели устида ишлаётиб, унинг ташқи қиёфасига кўпроқ агрессив кўриниш беришга интилди. Синиқ чизиқлар ва эгилган жойлар седанга ғайратлилик ва ўзгача жозиба бахш этади. Кузовнинг ён қисмларидаги бўртма штамповкалар орқа қисм билан биргаликда кўп жиҳатдан Impala седанига ўхшаш, умуман олганда эса, кузовнинг кўпчилик элементлари афсонавий Camaro’га ўхшайди. Ўзбекистон бозорида автомобиль тўрт хил (садаф-оқ, оқиш кулранг, тўқ кулранг ва қора) рангда тақдим этилади.

Автомобиль интерьерида эса  янги ускуналар панели ва рул чамбараги пайдо бўлди. Марказий консоль ўртасига MyLink моделидаги 7 дюймли Touch Screen кўнгилочар-ахборот мажмуаси жойлашди. Руль чамбараги анча олдинга чиқарилган, унинг ортига эса аналогли датчиклари бўлган борт компьютери яширинган. Орқа ўриндиқдаги йўловчилар эса қўшимча 33 мм бўш жойга эга бўлди ва энди шовқиндан изоляциядан тўлиқ қулайликда баҳраманд бўлиши мумкин.

Янги русумдаги автомобиль, унинг имкониятлари, тузилиши ҳамда нархлари борасидаги тўлиқ маълумот билан ушбу ҳавола орқали танишишингиз мумкин.

Аввалроқ GM Uzbekistan компанияси бутунлай янгиланган Chevrolet Malibu бизнес-класс седанини ишлаб чиқара бошлаши хабар берилган эди.