Аргентина пойтахти суди буюртма олиш учун Uber йўловчи ташиш онлайн хизматидан фойдаланган ҳайдовчини шартли равишда икки кунлик қамоқ жазосига ҳукм қилди. Бу ҳақда Буэнос-Айрес прократурасининг ахборотига таяниб, «ТАСС» хабар берди.
Қарорга кўра, ҳайдовчи «жамоат жойидан номувофиқ фойдаланиш» ва «ноқонуний фаолият билан шуғулланиш»да айбдор деб топилган. Шунингдек, судья шартли равишда ҳайдовчига икки ой давомида автомобиль ҳайдашни тақиқлади.
Прокурор Мартин Лападунинг сўзларига кўра, жавобгарликка тортилган ҳайдовчи икки йил ичида яна Uber хизматидан фойдаланса ёки бошқа қонунбузарликка йўл қўйса, шартли жазо ҳақиқийга айланади.
Uber 2016 йил апрель ойида Буэнос-Айресда буюртмалар қабул қилишни бошлаган. Шу ойнинг ўзида пойтахт суди таксичилар касаба уюшмаларидан ариза қабул қилган ва шаҳар раҳбариятини иш бўйича якуний қарор чиққунга қадар хизмат фаолиятини тўхтатишга мажбур қилган эди. Компания қарорга бўйсунишдан бош тортган.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)