Олий судда «Ўзбекистонда қонун устуворлиги йўлида ҳамкорлик» қўшма лойиҳаси доирасидаги халқаро давра суҳбати бўлиб ўтди

Ўзбекистон Республикаси Олий судида «Фуқаролик ишлари бўйича судлар фаолиятини янада такомиллаштириш — суд-ҳуқуқ ислоҳотларининг устувор йўналиши» мавзусидаги халқаро давра суҳбати бўлиб ўтди. Бу ҳақда «Дарё»га тадбир ташкилотчилари маълум қилди.

Тадбир Олий суд, АҚШ Халқаро тараққиёт агентлиги (USAID) ва БМТ Тараққиёт дастурининг «Ўзбекистонда қонун устуворлиги йўлида ҳамкорлик» қўшма лойиҳаси доирасида ташкил қилинди.

Давра суҳбати ишида хорижий экспертлар ва халқаро ташкилотлар вакиллари билан бир қаторда Олий суд, Бош прокуратура, Адлия вазирлиги, Ўзбекистон Республикаси Президенти ҳузуридаги Амалдаги қонун ҳужжатлари мониторинги институти, Суд департаменти, Адвокатлар палатаси мутахасислари ҳамда ҳуқуқ соҳасидаги олимлар ва тадқиқодчилар иштирок этди.

Иштирокчилар «Ўзбекистонда қонун устуворлиги йўлида ҳамкорлик» қўшма лойиҳаси иш режаси асосида ўтказилган Ўзбекистон Республикаси фуқаролик ишлари бўйича судлар фаолиятининг функсионал таҳлили натижаларига алоҳида урғу берди. Ушбу ҳужжат методологияси ва якуний ҳисоботини тайёрлашга сербиялик халқаро консултант жалб қилинганини қайд этилди.

Давра суҳбатида сўз олганлар мамлакатда қонун устуворлигини таъминлаш, суд тизими тузилмасини тубдан такомиллаштириш ва фаолияти самарадорлигини ошириш, судларнинг чинакам мустақиллигини мустаҳкамлаш борасида олиб борилаётган ислоҳотларни юқори баҳолади. Суд ҳокимияти тармоғини ислоҳ қилиш ва либераллаштириш Ҳаракатлар стратегиясининг устувор йўналишларидан бири эканлигини таъкидлади.

«Дарё»нинг Telegram’даги расмий канали — @toshqindaryo’га аъзо бўлинг!