Ўзбекистон — Қатар (1:0) ўйини якунига етганидан сўнг «Championat.asia» нашри миллий терма жамоанинг етакчи футболчиларидан бири ҳисобланган Азиз Ҳайдаровдан кичик интервью олди. Унда футболчи мундиалда тўп суриш фақатгина мухлисларнинг эмас, футболчиларнинг ҳам орзуси эканини қайд этган.
Стадионга барчамиз худди финал учрашувидек чиқдик. Якунда ижобий натижага эришдик. Мураббийимиз қантай тактика танлаган бўлса — худди шундай ўйнадик. Афсуски, Сурия терма жамоасидан мағлуб бўлдик.Ҳайдаровнинг фикрича, бугун мағлуб бўлган жамоа эртага зафар қучади. Футболчини эса руҳан синдириб қўйиш керак эмас.Ҳаётда фақат олдинга интилиб яшаш керак. Жаҳон чемпионатида иштирок этиш нафақат мухлисларнинг, балки мураббий ва футболчиларнинг ҳам орзуси. Мухлислар биз билан доим бирга бўлишини истардим. Уларга биргина эътирозим бор, футболчи яхшими ёки ёмон — майдондан чиқиб кетаётганида уни олқишлар билан кузатиб қўйиш керак. Бу — этика.
2-3 йилдан сўнг биз ҳам терма жамоа мухлиси бўламиз. Ўрнимизни босадиган ёш футболчилар чиқиб келмоқда.
Азиз Ҳайдаров, Ўзбекистон термаси аъзоси
Маълумот учун, Азиз Ҳайдаров Сурия ва Қатар термаларига қарши ўйинлар статистикасига кўра рақиб ҳужумини энг кўп марта йўққа чиқарган футболчи ҳисобланади.