Осиё Чемпионлар лигасининг «А» гуруҳида кураш олиб бораётган Тошкентнинг «Локомотив» клуби 3-турни Эронда ўтказиб, «Истиқлол» клубига имкониятни бой берди — 0:2.
Мезбонлар ҳар икки бўлимда 1 тадан гол уриб, очколари сонини 6 тага етказиб олди. Бир тур аввал Теҳрон клуби Саудиянинг «Ат-Таавун» клуби устидан 3:0 ҳисобида зафар қучган бўлса, гуруҳ босқичини Амирликларда «Ал-Аҳли»дан енгилиш билан бошлаганди — 1:2.
«Локомотив» эса аксинча, «Ат-Таавун» майдонидан 0:1 ҳисобидаги мағлубият билан қайтган бўлиб, ўз уйида «Ал-Аҳли»ни таслим қилганди — 2:1.
«Локомотив» ўтган мавсум Чемпионлар лигасининг чорак финалига қадар етиб борган бўлиб, гуруҳ босқичини мағлубиятсиз ўтказганди: 2 та ғалаба ва 4 та дуранг. Жорий мавсумда эса 3 та ўйиннинг 2 тасида енгилиб улгурди.
«Локомотив» иккинчи даврадаги икки учрашувни Тошкентда ўтказади ҳамда ўзини мағлуб этган Саудия ва Эрон клубларидан реванш олишга уриниб кўради.
Осиё Чемпионлар лигаси «А» гуруҳи. 3-тур 13 март, душанба
«Истиқлол» (Эрон) — «Локомотив» (Ўзбекистон) 2:0
Голлар: Фаршид Исмоилий, 37 (1:0). Али Гурбаний, 83 (2:0).«Локомотив»: Игнатий Нестеров — Шуҳрат Муҳаммадиев, Бобур Йўлдошев, Ислом Тўхтахўжаев, Олег Зотеев, Кахи Махарадзе, Тимур Кападзе (Ньоре Кризо, 66), Марат Бикмаев, Саламат Қутибоев (Қувондиқ Рўзиев, 80), Сардор Мирзаев (Мурод Бобожонов, 89), Жалолиддин Машарипов.
Изоҳ (0)