Келиб чиқиши австриялик актёр ва Калифорния штати собиқ губернатори Арнольд Шварценеггер келажакда АҚШ Конгресси Сенатига ўз номзодини қўйиши мумкин, деб ёзади «ТАСС» Politico газетасига таяниб.
Нашрнинг Калифорниядаги Республикачилар партиясига алоқадор манбаларига кўра, Шварценеггер 2018 йилда сенат аъзолигига ҳаракат қилиб кўриши мумкин. Актёрнинг расмий вакили Даниэль Кетчелл ҳам унда бундай режалар пайдо бўлиши мумкинлигини истисно қилмади.
Шварценеггер Американинг амалдаги етакчиси Дональд Трампнинг сиёсий йўналишига қарама-қарши бўлган сиёсий платформани таклиф қилиши мумкин.
Шу йил бошида актёр ва президент ўртасидаги пичинглар ОАВлар эътиборини тортган эди. 2 февраль, пайшанба куни Трамп Миллий ибодат нонуштаси муносабати билан сўзлаган нутқида Шварценеггер «Машҳурнинг шогирди» (The Celebrity Apprentice) кўрсатуви рейтингини тушириб юборгани учун уни «дуо қилиб қўйишга» чақирди. Актёр ва реалити-шоу бошловчиси Арнолд Шварценеггер эса АҚШ президенти Дональд Трампга «ўзаро ўрин алмашишни» таклиф қилди.
Изоҳ (0)