«Барселона» — «ПСЖ». Парижликларга аталган миллион евро, «Реал» афсонаси Раулнинг ўхшамаган қайдлари ва Суареснинг ишончи

«1 миллион евро. Ҳар биримизга»

Париждан 0:4 ҳисобидаги мағлубият билан қайтган «Барселона»нинг жавоб ўйинида қандайдир каромат кўрсатишига ишониш қийин эди. Умид қилган футбол мухлислари бор бўлса-да, 6:1 натижасини тахмин қилганлар кўп бўлмагани табиий.

«Sports.ru»нинг Франция нашрларига асосланиб хабар беришича, Париждаги биринчи ўйин олдидан футболчилар билан юзлашган клуб президенти «Барселона» довонидан ўтилиши учун ҳар бир футболчига 1 миллион евродан мукофот пули ваъда қилганди.

Дунёнинг энг бой юз нафар одамидан бири бўлган Носир Ал-Ҳалайфининг мотивацияси илк ўйиндаги 4:0 учун етарли бўлди. Аммо жавоб ўйинида бу пуллар ҳам иш бермади.

Рауль

Мадриднинг «Реал» клуби афсоналаридан бири бўлган Рауль жавоб ўйини олдидан ўз фикрлари билан ўртоқлашиб, 0:4 ҳисобини йўққа чиқариши мумкин бўлган жамоа бу фақатгина «Қироллик клуби» эканини қайд этганди.

Агар шу вазиятдан чиқиб кетиши мумкин бўлган жамоа бор бўлса — бу фақат «Реал»дир. У шунинг учун ихтисослаштирилган.

Агар «ПСЖ» ўз даражасида тўп сура олса, «Барселона» Ла лигадаги каби 4 ёки 5 талаб гол уролмайди. Айтишим мумкин бўлгани фақатгина Каталония клубида потенциалнинг бор экани.

«ПСЖ» турнир охирига қадар етиб боришга қодир. Унаи Эмери супер мураббий. Мен уларга юз фоиз ишонаман.

Рауль Гонсалес, «Реал Мадрид» собиқ аъзоси

Луис Суарес

Кечаги учрашув қаҳрамонларидан бири Луис Суарес эса 0:4 дан кейин ҳам ишончни йўқотмаганди. Каталония клубининг навбатдаги босқичга йўл олишида футболчилардаги мана шу жиҳат муҳим рол ўйнаган бўлса ажаб эмас.

Биз 4 та гол фарқини йўққа чиқариш нақадар қийин эканини тушунамиз. Бироқ футболда уддалаб бўлмайдиган ишнинг ўзи йўқ. Агар 4 та гол уришга қодир жамоа бўлса — бу «Барселона». Ҳаммаси вақт, сабр ва бизнинг ўйин услубимизга боғлиқ. Чунки биз топ клубга қарши чиқаётганимизни биламиз.

0:4 дан кейин кўп вақт ўтиб кетгандек. Дастлабки кунлар қийин бўлди. Мағлубият биз учун оғриқли эди. Аммо футбол шуниси билан гўзалки, биз қисқа фурсат ичида ўзимизни ўнглаб олдик. Биз бунга эришдик.

Тўғри руҳий тайёргарлик ва голлар — жавоб ўйинидаги вазифамиз шундан иборат. Чунки учрашувни кутиб яшадик. «Барселона» ва унинг мухлислари муҳим беллашув арафасида турибди. Олдин биз ҳеч қачон 0:4 вазиятидан чиқиб кета олмаганмиз.

Луис Суарес, «Барселона» аъзоси

Суареснинг фикрлари учрашувдан кейин ўз тасдиғини топди ва «Барселона» фантастик тарзда чорак финал йўлланмасини қўлга киритди.