АҚШ Сенати нейрожарроҳ, АҚШ президентлик лавозимига республикачилардан собиқ номзод Бен Карсонни турар-жой қурилиши ва шаҳар тараққиёти вазири лавозимига тасдиқлади. Бу ҳақда «Газета.ru» хабар бермоқда.
Унинг номзоди учун 58 нафар сенатор овоз берди, сенаторларнинг 41 нафари қарши овоз берди. Шу тариқа, Карсон АҚШ президенти Дональд Трамп маъмуриятида расман тайинланган биринчи афроамерикалик бўлди.
Бен Карсон — америкалик нейрожарроҳ-шифокор ва ёзувчи. Дунёда биринчи бўлиб энса қисми туташган Сиам эгизакларини ажратган. Президентлик сайловларида у Республикачилар партияси праймеризида иштирок этган, бироқ кейинроқ курашдан чиқиб, Дональд Трампни қўллаб-қувватлаган.
Дастлаб Карсон Трамп маъмуриятидаги лавозимни эгаллашдан бош тортган, бироқ кейинроқ ўйлаб кўриб, розилигини берган.