АҚШнинг Шимолий Дакота штатидаги Шайен-Ривер резервациясида яшовчи сиу ҳиндулари вакиллари федерал судга мурожаат қилиб, Dakota Access Pipeline нефть қувурининг Миссури дарёси тагидан ўтадиган сўнгги қисми қурилишини тақиқлашни талаб қилди, деб ёзади «ТАСС».
Тақдим этилган ҳужжатларда улар нефть қувури ётқизилиши натижасида ҳиндулар резервацияси учун ичимлик суви манбаси ифлосланиши хавфи юзага келишини, шунингдек, нефть қувурининг қурилиши уларнинг диний ҳуқуқларини чеклашини, чунки маросимлар учун уларга тоза сув зарурлигини рўкач қилади.
Аввалроқ худди шундай талабларни Standing Rock резервациясидаги ҳиндулар ҳам илгари сурган, аммо февраль ўртасида федерал округ судьяси ҳиндулар вакилларининг қурилишни вақтинчалик тақиқлаш ҳақидаги сўровини суд улар тақдим этган далилларнинг барчасини кўриб чиққунига қадар рад этган эди.
Бу пайтда эса нефть қувурини қураётган Energy Transfer Partners компанияси қувурнинг сўнгги участкасидаги тайёргарлик ишлари якунланганини эълон қилди ва қувурларни Миссури дарёси тубига ётқизишни бошлашга тайёрланмоқда.
Эслатиб ўтамиз, январь ойида АҚШ президенти Дональд Трамп ҳиндуларнинг ерлари орқали нефть қувури қурилишига қўйилган тақиқни олиб ташлади. Вақтинчалик тақиқ 2016 йил декабридан буён амал қилиб келган эди. Уни Барак Обама маъмурияти мамлакат туб аҳолиси вакилларининг узоқ давом этган норозилик намойишлари фонида киритган эди.
Изоҳ (0)