Янги Зеландиянинг Крайстчерч шаҳри яқинида бир неча кундан буён кучли ўрмон ёнғинлари давом этмоқда. Ўтган кунлар ичида мингдан ортиқ одам эвакуация қилинган. Бу ҳақда «Корреспондент.net» хабар бермоқда.
«Кўпчилик одамлар олов туфайли ўз уйларидан маҳрум бўлди. Аҳолининг катта қисми эвакуация қилинган, табиий офат оқибатида жабрланганлар бор», — дейди мамлакат бош вазири Билл Инглиш.
Инглиш бугун, 16 февраль куни Крайстчерчга етиб келди ва ҳудудни ҳаводан кўздан кечирди. Унинг сўзларига қараганда, оловнинг тарқалишини тўхтатиб туришга эришилмоқда, бироқ ёнғин билан боғлиқ вазият назорат остида деб бўлмайди.
Олов аллақачон уч баробар катта ҳудудга, 1800 гектаргача тарқалган. Шаҳарда фавқулодда вазият эълон қилинган.
Ёнғин оқибатида ўт ўчириш вертолётининг учувчиси ҳалок бўлган. Яна икки киши шифохонага тушган.
Олов 11 та уй ва икки хўжалик биносини йўқ қилди, 450 хонадон аҳолиси эвакуация қилинган. 130 га яқин хўжалик электр таъминотидан узилиб қолган, учта мактаб ва бир нечта йўл ёпилган.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)