Ўзбекистон миллий терма жамоаси сардори Одил Аҳмедов тўп сурадиган Хитойнинг «Шанхай СИПГ» клуби Осиё Чемпионлар лигасининг гуруҳ босқичига йўл олди.
Плей-офф раундида шанхайликлар Таиланднинг «Суҳотаи» клубига рақиб бўлиб, йирик — 3:0 ҳисобида зафар қучди. Беллашувда ҳисоб Одил Аҳмедовнинг голли узатмасидан сўнг Оскар томонидан очилди, кейинроқ бразилиялик бошқа футболчи Элкесен тайлар дарвозасига иккинчи голни урди. Иккинчи бўлимдаги автогол ҳисобни йирик кўринишга олиб келди.
Бу Одил Аҳмедовнинг «Шанхай СИПГ» сафидаги илк расмий учрашуви бўлиб тарихга кирди. Лимитдан тўлиқ фойдаланган португалиялик мураббий Андре Виллаш-Боаш уни ва бразилиялик уч футболчини бошланғич таркибга киритди. Регламентдан келиб чиқиб, португалиялик Рикарду Карвалю Чемпионлар лигаси учун рўйхатдан ўтказилмаган.
Маълумот учун, «Шанхай СИПГ» Осиё Чемпионлар лигасининг гуруҳ босқичида «Сеул» (Жанубий Корея), «Урава Ред» (Япония), «Вестерн Сидней» (Австралия) жамоаларига рақиб бўлади.
Осиё Чемпионлар лигаси Плей-офф 7 февраль, сешанба
«Шанхай СИПГ» (Хитой) — «Суҳотаи» (Таиланд) 3:0
Голлар: Оскар, 34 (1:0). Элкесен, 39 (2:0). Киаттисак Тупҳунтод, 58-авт (3:0).
Изоҳ (0)