Осиё Чемпионлар лигаси. «Насаф» Саудия Арабистонига, «Бунёдкор» Қатарга етиб келди ва илк машғулотини ўтказди

Футбол бўйича Осиё Чемпионлар лигасининг гуруҳ босқичида иштирок этиш учун ҳаракат қилаётган Қаршининг «Насаф» ва Тошкентнинг «Бунёдкор» клублари эртага — 7 февраль куни плей-офф ўйинида майдонга тушади.

Ўтиш босқичида Баҳрайн чемпиони дарвозасига жавобсиз 4 та гол урган «Насаф» Саудия Арабистонининг «Ал-Фотиҳ» клубига қарши кураш олиб борса, «Бунёдкор» Қатарда «Ал-Жаиш» билан ҳисоб-китоб қилади. «Насаф» иштирокидаги ўйин 20:00 да, «қалдирғочлар»нинг беллашуви эса 20:15 да старт олади.

Ўзбекистоннинг ҳар икки клуби ўйин бўлиб ўтадиган шаҳарларга етиб келди ва учрашув ўтадиган стадионда дастлабки машғулотини ўтказди.

«Насаф» футболчилари Ал-Аҳса шаҳрига етиб келиши билан Al Ahsa Inter Continental меҳмонхонасидан қўним топган.

Қарши клубининг рақиби Саудия Арабистони Про лигасида бор-йўғи 12-ўринни эгаллаб турибди.

«Бунёдкор» БААдаги йиғиндан сўнг Қатарга келди ва Доҳадаги Warwick меҳмонхонасидан жой олди.

Тошкент клубининг рақиби Қатар Юлдузлар лигасининг кучли тўртлигида бормоқда.