Наманганда яна бир китоб савдоси маркази иш бошлади

Наманган шаҳрининг Навоий кўчасида «Наманган китоб олами» МЧЖга қарашли иккинчи китоб дўкони иш бошлади. Бу ҳақда «Namnews.uz» хабар бермоқда.

Ўтган йил май ойида жамият ўзининг илк мажмуасини фойдаланишга топширганди. Мўъжаз ўқув зали, тамаддихона ва болалар бурчаги мижозлар хизматида бўлган тўрт қаватли бу замонавий мажмуада ижтимоий-сиёсий, маънавий-маърифий, адабий-бадиий, илмий-оммабоп, болалар адабиёти, дарсликлар каби йигирмага яқин бўлимда ўн минглаб китоб ўқувчилар эътиборига тақдим этиб келинмоқда.

Келажакда «Наманган китоб олами» дўконларини вилоятнинг ҳар бир туманида очишни режалаштирмоқдамиз. Энг асосийси, Наманган шаҳрининг аҳоли гавжум марказий қисмида «Адабиёт уйи» қуришни устувор мақсад қилиб белгилаб олдик. Вилоят ижодкорлари, нашриётлари ва адабиёт ихлосмандларини бирлаштирувчи, халқаро адабий алоқаларни йўлга қўювчи, йирик китоб кўргазмалари ва тақдимотлари ўтказиш имкониятини берувчи мажмуа барпо этиш ниятидамиз.

Маъруф Мўминов, маърифатпарвар тадбиркор

«Наманган китоб олами» МЧЖ ўз мижозларининг талабларини ўрганиш юзасидан мониторинг фаолияти ҳам олиб бормоқда. Бу борада илк қадам сифатида Vodiy Media нашриёти билан «Наманган адабиёти хрестоматияси» номли тазкира чоп этиш юзасидан шартнома тузилди.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.