Вазни 430 килограмм бўлган покистонлик Арбоб Ҳизр Ҳаёт ўзини дунёнинг энг кучли одами деб эълон қилди ва, айни вақтда, замонавий Геркулес сифатида тарихда ном қолдириш истагини билдирди. Бу ҳақда Daily Mail хабар бермоқда.
25 ёшли Ҳаёт рестлинг билан профессионал тарзда шуғулланмоқчи ва пауэрлифтингда чемпион бўлмоқчи. Унинг қайд этишича, у бир кун келиб бу ниятларига албатта эришади.
Marvel комикслари қаҳрамони шарафига ватандошлари томонидан Халк деб таърифланган Ҳаёт ҳозиргидек тана кўринишига эга эканлиги учун шукрона айтади ва янада оғирроқ бўлишни хоҳлайди.
Бунинг учун у ҳар куни 10 минг килокалорияга тенг егулик тановул қилади: хусусан, нонуштага 36 та тухумни паққос туширади, кун бўйи эса 3 килограммдан ортиқ гўшт ва 5 литр атрофида сут истеъмол қилади.
Ҳаётнинг бўйи 190 сантиметрни ташкил қилади. Ўзининг айтишича, у танаси билан боғлиқ ҳеч қандай муаммоларни ҳис қилмайди.
Ҳозирги кунда расман америкалик Брайан Шоу жаҳоннинг энг кучли одами ҳисобланади. Жаҳоннинг энг кучли одами ҳар йили World’s Strongest Man мусобақасида аниқланади.
Жаҳондаги вазни энг оғир одам эса саудиялик Холид бин Муҳсин Шаърийдир. Унинг вазни 610 килограммга тенг.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)