Ўзбекча трансфер. «Локо» икки футболчини бой берди, «Насаф» руминларни мағлуб этди, «Бунёдкор» шотланд клубидан енгилди

«Локомотив»

Осиё чемпионлар лигасида ярим финалга етиб боришни истаётган клуб икки асосий футболчисидан айрилди: Сервер Жепаров ва Темурхўжа Абдухолиқов. Футболчилар Эрон ва Қатар клублари билан 1,5 йиллик шартномага имзо чекди.

Уларнинг ўрни кимлар билан тўлдирилади? Иван Нагаев «Локомотив» билан хайрлашган, Марат Бикмаев 32 ёшга қараб кетмоқда. Чемпионлар лигасининг ярим финалига чиқиш учун гол уриш керак. Голни ким ёки кимлар уради?

Санъат Шарипов

Футбол агенти Сервер Жепаровнинг Эронга йўл олиши ҳақида биринчи бўлиб маълум қилган ва кейинчалик бу ўз тасдиғини топганди. 15 январь куни Шарипов «Локомотив»нинг икки футболчиси Қатарга ўтиши ҳақида айтиб ўтди. 16 январь куни Темурхўжа Абдухолиқовнинг «Ас-Сайлия» сафига қўшилгани маълум қилинди.

Иккинчи футболчи ким? Яқин соатлар ичида «Локомотив» яна бир футболчисини Қатарга кузатса ажаб эмас.

«Бунёдкор»

Ўртоқлик учрашувлари учун рақибларни чертиб-чертиб танлаган «Бунёдкор» Шотландиянинг «Абердин» клубига имкониятни бой берди — 1:2. «Қалдирғочлар» бунга қадар Гана терма жамоасидан 0:2 ҳисобида енгилган, Хитойнинг «Хенан Жианье», Саудиянинг «Ал-Файсалий» клублари билан эса 1:1 ҳисобида дуранг ўйнаганди. 20 январь куни «Бунёдкор» Иордания термасига қарши ўртоқлик ўйинида майдонга тушади.

«Бунёдкор» — «Абердин» (Шотландия) 1:2

Голлар: Хаес, 2 (0:1). Жавоҳир Эсонқулов, 33 (1:1). Шинние, 75 (1:2).

«Насаф»

Рўзиқул Бердиев стабил ушлаб турган Қарши клуби Европанинг кучсиз клубларини мағлуб этишда давом этди. Бунга қадар Кипр ва Озарбайжон жамоалари устидан 1:0 ҳисобида зафар қучган «Насаф», энди Руминиянинг «Ботошани» жамоасини шу ҳисоб билан мағлуб этди.

«Насаф» — «Ботошани» (Руминия) 1:0

Гол: Драган Черан, 34 (1:0).

«Пахтакор»

Сўнгги мавсумида кучли тўртликка ҳам кира олмаган «Пахтакор» 26 нафар футболчи билан Шаржага жўнаб кетди. Олдинда клубни 4 та ўртоқлик ўйини кутиб турибди:

18 январь, чоршанба«Пахтакор» — «Чанчун Ятаи» (Хитой)

25 январь, чоршанба«Пахтакор» — «Краснодар» (Россия)

27 январь, жума«Пахтакор» — «Жилина» (Словакия)

29 январь, якшанба«Пахтакор» — рақиб изланмоқда…