Сервер Жепаров
Куннинг энг муҳим янгилиги Ўзбекистон миллий терма жамоаси вице-сардори Сервер Жепаровнинг Эронга йўл олиши мумкинлиги бўлиб турибди.
2016 йилги мавсумни Тошкентнинг «Локомотив» футбол клубида ўтказган Сервер Жепаров Жанубий Корея ва Саудия Арабистони каби чемпионатларда тўп сурган ва ҳар иккисида ҳам мамлакат чемпионлигини қўлга киритган. Унинг Эронга йўл олиши мумкинлиги ҳақида футбол агенти Санъат Шарипов Twitter саҳифаси орқали маълумот берди.
Эроннинг «Истиқлол» клуби яқин соатлар ичида Сервер Жепаровга 1,5 йиллик шартнома таклиф қилиши мумкин, деб ёзган Санъат Шарипов. Бу янгиликни ҳозирга қадар «Локомотив» ҳам, футболчининг ўзи ҳам тасдиқлаганича йўқ.
Анзур Исмоилов
Хитойнинг «Чанчун Ятаи» футбол клубида тўп сураётган Ўзбекистон миллий терма жамоаси ҳимоячиси Анзур Исмоилов жамоаси билан Амирликларда бўлиб турибди. Кеча — 9 январь куни «Чанчун Ятаи» Германия Бундеслигаси вакили «Айнтрахт»га қарши ўртоқлик ўйинида майдонга тушди ва 0:3 ҳисобида имкониятни бой берди.
Айни вақтда «Айнтрахт» аъзоси ҳисобланган Саболч Хусти ўз вақтида «Чанчун Ятаи» сафида тўп сурганди, деб ёзди «Championat.asia». Ўртоқлик ўйини вақтида Анзур Исмоилов собиқ жамоадоши билан кўришган.
Шавкат Саломов
Фаолиятини Малайзияда давом эттиришга яқин турган Шавкат Саломов «Бухоро» клубининг 2016 йилги мавсумдаги энг яхши футболчиси деб топилди. Клуб сайти ўтказган сўровномада 1628 нафар мухлис иштирок этган.
Саломов энг яхши бўлиш учун овозларнинг 19 фоизига эга чиққан. Жамоа тўпурари Азиз Ибрагимов эса 12 фоиз овоз билан иккинчи бўлган. Овозларнинг 5 дан 1 қисмини ҳам олмай энг яхши бўлиш шунчаки ажойиб. Бундай ранг-барангликни бошқа клубларда кузатиш қийин.
«Бошпана излаб»
«Championat.asia» нашри маълумотига кўра, Темур Ҳакимов ва Алишер Шоғуломов эркин агентга айланди.Темур Ҳакимов 1994 йилда туғилган футболчилар терма жамоасида пайдо бўлиб, Мексика қаҳрамони бўлган ва пул ютуқлари, Spark автомашинаси билан тақдирланган, кўкка кўтарилганди. Орадан кўп ўтмай футболчи Ўзбекистон олий лигаси клубларига ҳам керак эмас. Йўқса етакчи жамоалар уни бир неча йиллик шартнома билан ўз сафига қўшиб оларди.
Алишер Шоғуломов ҳам 1994 йилда туғилган. Аммо Мексикага борадиган футболчилар орасига киритилмаган.
Ҳар икки футболчи 2016 йилги мавсумни Тошкентнинг «Обод» клубида якунлаганди. Ибтидо эса бошқа жамоалар билан боғланган. Ҳакимов «Сўғдиёна»да, Шоғуломов «Андижон»да старт олганди. Темур мавсум давомида 19 та ўйинда иштирок этди ва 1 та гол урди. Алишер эса 22 та ўйинда шунча гол урди.
Маълумот учун, ҳар икки футболчи ҳам ҳужум чизиғида тўп суради. Суратда улар келаси мавсумда камида нечта гол уришига шама қилаётгандек.
«Олмалиқ»
Бош мураббий Виктор Кумиков беларуслик Владислав Касмин билан шартнома тузилгани ҳақида айтиб ўтди. Унинг қанчага мўлжаллангани ва айнан нимаси ёқиб қолганига аниқлик киритилмаган. У ҳақдаги маълумотдан ҳам, шартнома тузилгани ҳам клуб расмий сайтида кўриниш бермаган.
«Олмалиқ» қишки йиғинни Туркиянинг Анталия шаҳрида олиб боради. Аввалроқ клубни Игорь Шквирин бошқариб бораётганида футболчилардан қарздорлик борлиги ҳақида хабар пайдо бўлганди. Кейинроқ эса клуб сафида 9 йил ишлаган Игорь Шквиринга 300 минг сўм қарзи борлиги айтилганди. Анталия сафари харажатларига шу пул ҳам қўшилганми ёки йўқ, ойдинлик киритилмаган.
Кумиков Анталияда Швейцария, Россия ва Украина клублари билан ўйин бўлиб ўтишига ишонтирди. Рақибларнинг «Вил—1990», «Сибирь», «Карпати» экани эса номлари келтирилган мамлакатлар фонида хиралашиб қолди.
«Бунёдкор»
Амирликларда бўлиб турган «Бунёдкор» ўртоқлик учрашувлари учун яхши рақиблар топган. Клуб сайти йиғиндан фотосуратлар тақдим этди.
Кимгадир берилган шунча соч...
Кимдир эса ундан мосуво...
Изоҳ (0)