Эрон миллий терма жамоаси бош мураббийи Карлуш Кейруш ўз вазифасида давом этади. Бу ҳақда ЎФФ матбуот хизмати Эрон футбол федерацияси президенти Меҳди Тажга асосланиб хабар берди.
Кейруш Эрон миллий терма жамоаси билан Амирлик йиғинида бўлиб турганида «Персиполис» бош мураббийи Бранко Иванкович жамоанинг 7 нафар футболчисини Эронга чақириб олган, бу ҳол эса Кейрушга ёқмаганди. Орадан бир кун ўтиб мутахассис Эрон терма жамоасидан кетиши ҳақида айтиб ўтганди.
Натижада ЭФФ махсус матбуот анжумани ташкил қилишга мажбур бўлди. Унда сўз олган ташкилот президенти Меҳди Таж Карлуш Кейрушнинг мамлакат термасидаги муваффақиятлари, хусусан, Осиё мамлакатлари орасида Эрон бир неча йилдан буён ФИФА рейтингида етакчилик қилаётганини таъкидлади. Бундан ташқари, Осиё Чемпионлар Лигасида форс клублари учун 4 та квотани сақлаб қолиш муҳим экани айтилди.
Матбуот анжумани давомида федерацияси раҳбари терма жамоа ва клублар ўртасидаги муаммолар амалдаги регламентга мувофиқ ўзаро ҳурмат орқали бартараф этилиши кераклигини таъкидлади, деб ёзилган ЎФФ хабарида. Шундан кейин 63 ёшли португалиялик мутахассис ўз жойида қолишига ойдинлик киритилган.
Қайд этиш жоиз, Эрон ҳамда Ўзбекистон ўзаро келишувига кўра, ЖЧ—2018 саралашининг 8-тури доирасидаги учрашувни 2017 йилнинг 13 июнь кунидан 12 июнь санасига кўчирганди.
Мазкур гуруҳнинг 5-туридан кейин Эрон 11 очко билан пешқадам бўлиб турибди. Жанубий Корея ҳисобида 10, Ўзбекистонда эса 9 очко жамғарилган.
Изоҳ (0)