Рукн ўзбекистонлик футболчи Санжар Турсунов билан бошланади. Яқиндагина Қатарнинг «Ал-Ҳарайтият» клуби билан битим тузган Санжар Турсунов Юлдузлар лигасининг 15-турида голли узатма берди. Бу ҳақда «Championat.asia» сайти маълумот берди.
«Ал-Вакра» клубига қарши кечган ўйиндар Турсунов ва жамоадошлари 2:1 ҳисобида зафар қучган. Турсунов 33-дақиқада урилган биринчи голга пас берди. Майдонда эса 88 дақиқа ҳаракат қилди. Айни вақтда унинг жамоаси 14 та клуб тўп сурадиган Юлдузлар лигасида 8-ўринни эгаллаб турибди.
Маълумот учун, чемпионатда 3-ўринда бораётган ва таркибида Сардор Рашидов тўп сурадиган «Ал-Жаиш» 15-турни бугун — 9 январь куни «Ал-Араби»га қарши ўтказади. Бу жамоа 7 февраль куни Тошкентнинг «Бунёдкор» клубига қарши Осиё чемпионлар лигаси плей-офф ўйинида майдонга тушади.
«Бунёдкор»
Сергей Лушчан қўли остидаги жамоада сербиялик ҳимоячи Александар Игнатович кўрикда бўлиб тургани ҳақида маълумот берилганди. Эндиликда унинг ёнига бошқа бир сербиялик Душан Мичич қўшилди.
Ярим ҳимоячи аллақачон 32 ёшни қарши олган. Сўнгги жамоаси «Войводина». «Рудар» клуби билан Черногория кубогини икки бор қўлга киритган. Бу ёшида «Бунёдкор»га қандай ёрдам бериши мумкин эканига аниқлик киритилмаган.
Ўртоқлик учрашуви
«Бунёдкор» — «Аш-Шааб» (БАА) 2:1
Голлар: Диалло, 22 (0:1). Вадим Чемиртан, 44 (1:1). Шаҳзод Нурматов, 76 (2:1).Четлатиш: Нурилло Тўхтасинов, 56 (Б).
«Бунёдкор» Амирликлардаги биринчи ўртоқлик ўйинида муваффақият қозонди. Жамоанинг молдовалик янги аъзоси Вадим Чемиртан гол ургани эътиборга молик. Иккинчи бўлим бошларида «қалдирғочлар» бир киши кам қолса-да, ғалабани илиб кетган. Гол муаллифи бошқа бир ҳужумчи Шаҳзод Нурматов.
Ҳужумчилар ўзини кўрсатиши керак. «Бунёдкор»ни катта эҳтимол билан Баҳодир Насимов тарк этади. У Жанубий Корея клубларидан бири сафига ўтиши мумкинлиги борасида хабар пайдо бўлганди.
«Бунёдкор»нинг ўртоқлик ўйинида урилган голларга Отабек Шукуров ва Миржамол Қосимов голли узатма берган.
Режа
«Бунёдкор» Гана миллий терма жамоасига қарши ўртоқлик ўйинида майдонга тушиши ҳақида айтиб ўтилганди. Бу борада Гана ёлғиз эмас. Иордания терма жамоаси ҳам «қалдирғочлар» билан ўйин учун рози бўлган. Клуб матбуот хизмати олдиндаги рақиблар билан таништирди:
10 январь. «Бунёдкор» — Гана11 январь. «Бунёдкор» — «Хенан Жиане» (Хитой)13 январь. «Бунёдкор» — «Ал-Файсалий» (Саудия Арабистони)15 январь. «Бунёдкор» — «Абердин» (Шотландия)20 январь. «Бунёдкор» — Иордания
«Пахтакор»
БАА сафари сари ҳозирлик кўраётган «Пахтакор» сафида сербиялик Марио Маслач кўрикда экани айтилганди. Ҳимоячи «Championat.asia» сайтига кичик интервью берди.«Пахтакор» сафида бир неча кун шуғулландим. Бугун ўртоқлик ўйинида ўйнадим. Илк ўйиним бўлгани учун, қийналдим. Бундан яхшироқ ўйнашим мумкин эди. Майдоннинг ҳолати халал берди.Футболчилар билан чиқишиб кетдим. Клуб шароитлари қониқтирди. «Пахтакор» менга жуда ёқди. Бироқ вақтга мослашиш қийин кечмоқда.
Марио Маслач, эркин агент
«Пахтакор» сербиялик футболчиларга ёқиши турган гап. Бироқ клуб мухлисларига Маслач ёқадими ёки йўқ, айтиш қийин. Ҳозирча у — унга қадар келган серблардан катта фарқ қилмаслиги билиниб бўлган.
Айтганча, «Пахтакор» ўртоқлик ўйинини «Қўқон—1912» клубига қарши ўтказиб, 2:1 ҳисобида зафар қучди.
Изоҳ (0)