Янги — 2017 йилги мавсум учун тайёргарлик кўраётган Ўзбекистон клублари ўз сафини янги футболчилар билан тўлдиришда давом этади.
«Бунёдкор» — in
Ўтган мавсумни «Бухоро» клуби сафида ўтказган молдовалик Вадим Чемиртан «Бунёдкор» билан шартномага имзо чекди. Бу ҳақда маълумот берган клуб матбуот хизмати, шартноманинг қанчага мўлжалланганига ойдинлик киритмади.
Аввалроқ «Бухоро» клуби мухлислари Вадим Чемиртаннинг қолишини сўраб мурожаат қилгани, молдовалик футболчи эса оиласини боқиш учун Тошкентга кўчиб ўтгани ҳақида хабар чиққанди.
«Бунёдкор» бош директори Бахтиёр Бобоев эса 2016 йил жамоа сафида тўп сурган легионер футболчилардан ҳафсаласи пир бўлгани ҳақида айтиб, уларнинг барчасига жавоб берилганини таъкидлаганди. Вадим Чемиртан ўша фикрлардан кейинги биринчи битим бўлди.
Маълумот учун, «Бухоро»га қадар асосан Молдова клублари шарафини ҳимоя қилган Вадим Чемиртан ҳужум чизиғида тўп суради ва бу йил 30 ёшни қарши олади.
«Бунёдкор» — out
Жамоа шарафини сўнгги 6 йилдан буён ҳимоя қилиб келаётган ва 2016 йилги мавсумни сардор сифатида ўтказган Акмал Шораҳмедов қалдирғочлар билан хайрлашди.
Ўз вақтида Ўзбекистон миллий терма жамоаси шарафини ҳимоя қилган ўнг қанот ҳимоячиси фаолиятини Қаршининг «Насаф» клубида давом эттиради. Буни футболчининг ўзи ҳам, «Насаф» ҳам тан олиб бўлди.
Акмал Шораҳмедов «Бунёдкор»ни нима сабабдан тарк этганига ойдинлик киритмаган. Бу футболчининг қарорими ёки бош мураббий Сергей Лушчаннинг — очиқланмаган. Аввалроқ дарвозабон Акбар Тўраев «Олмалиқ» сафига кетиб қолганди.
Маълумот учун, «Насаф» ўзининг қанот ҳимоячиси бўлган Шуҳрат Муҳаммадиевни «Локомотив»га бой бериб қўйганди. Унинг ўрни эса Акмал Шораҳмедов билан тўлдирилди. Эндиликда жамоа Фозил Мусаев ва Азамат Алланиязовга ҳам ўринбосар топиши керак. Алланиязов катта эҳтимол билан фаолиятини «Қизилқум»да давом эттиради. Мусаев эса Япониянинг «Жубило Ивата» клуби билан шартнома тузганди.
Маълумот учун, «Насаф»нинг янги вакили Акмал Шораҳмедов 30 ёшда. У «Бунёдкор»га қадар «Сўғдиёна», «Навбаҳор», «Андижон» каби клублар шарафини ҳимоя қилган.
Қишки йиғинлар
Мавсумни ҳаммадан барвақтроқ бошлайдиган икки клуб — «Насаф» ва «Бунёдкор» хориж йиғинига жўнаб кетди. Бу борада «Насаф» Туркия, «Бунёдкор» БАА вариантини афзал билди. Тошкент клуби Шаржа шаҳрида 21 январга қадар машғулот олиб боради. Қарши клубининг Анталиядаги йиғини эса икки ҳафтага мўлжалланган.
«Насаф» Осиё чемпионлар лигасининг плей-оффи доирасида 31 январь куни Қаршида Баҳрайннинг «Ал-Ҳидд» клубини қабул қилади. Мазкур учрашувни ўз фойдасига ҳал қила олса, 7 февраль куни Саудияда «Ал-Фотиҳ» клуби билан тўқнаш келади.
«Бунёдкор» эса бир йўла 7 февраль куни майдонга тушади. Ўзбекистон вице-чемпиони Қатарда Сардор Рашидов тўп сураётган «Ал-Жаиш» билан тўқнаш келади.
Тошкентнинг «Локомотив» клуби ҳам «Бунёдкор» каби БААда йиғин ўтказади. «Темирйўлчилар»нинг 1 та рақиби аллқачон маълум. 20 январь куни Мирко Еличич жамоаси Санкт-Петербургнинг «Зенит» клуби билан ўртоқлик ўйинида майдонга тушади. «Зенит» 16 январь куни ўзбекистонлик футболчи Анзур Исмоилов ҳаракат қиладиган «Чанчун Ятаи» клуби билан ҳам беллашади.
«Локомотив»нинг сўнгги икки хариди билан шу ҳаволада танишиш мумкин. Жамоа Осиё чемпионлар лигаси гуруҳ босқичидаги илк учрашувини 20 февраль куни Саудияда «Ал-Тавун» клубига қарши ўтказади.
Изоҳ (0)