Фарҳод Тожиев Малайзиянинг «Т-Тим» клубидаги иккинчи ўйинида ҳам 2 та гол урди

Ўзбекистонлик футболчи Фарҳод Тожиев «Т-Тим» сафида яна бир бор дубл қайд этди, деб ёзди «Championat.asia» нашри.

Тожиевлар оиласининг кичик вакили Малайзиянинг «АТМ» клубига қарши 3:1 ҳисоби билан якунига етган ўйинда 2 та гол уриб, «Т-Тим»нинг ғалабасини таъминлаганди. Шундан кейин клуб футболчига шартнома таклиф қилгани ҳақида маълумот пайдо бўлди. Бироқ унинг қанчага мўлжаллангани айтилмади.

Кеча — 4 январь куни «Т-Тим» ўтган мавсумни вице-чемпион сифатида якунлаган «Фелда Юнайтед»га қарши саф тортди ва ўртоқлик ўйинида 3:2 ҳисобида ғолиб чиқди. Фарҳод Тожиев бу сафар ҳам 2 та гол уришга муваффақ бўлди. Қайд этиш керак, бир ҳафта муқаддам «Фелда Юнайтед» сафида тўп сурадиган ўзбекистонлик бошқа бир футболчи Лутфулла Тўраев шартномаси тугаб, юртига қайтиб келганди.

«Т-Тим» сафида ўзбекистонлик Дилшод Шарофутдинов ҳам тўп суради. Малайзия клуби, шунингдек, Шавкат Саломов ва Павел Смоляченко каби ўзбекистонлик футболчиларни ҳам синовга чақирган. Бироқ уларнинг тақдирига ойдинлик киритилмаган.

Маълумот учун, 3 январь куни ўзбекистонлик футболчи Бобур Акбаров «Куала Лумпур» клуби билан 1 йиллик келишувга эришди ва фаолиятини Малайзияда давом эттирадиган бўлди. У ўтган мавсумни «Андижон» клубида ўтказганди.

Шарқий Осиё мамлакатларидан яна бири — Таиланднинг «Чаинат Хонбилл» клуби янги йил олдидан «Андижон»нинг собиқ футболчиси — ўзбекистонлик Жавлон Гусейновни ўз сафига қўшиб олганди.