Футбол бўйича Ўзбекистон Олий Лигасида тўп сурадиган футболчиларнинг 75 фоизи эркин агентга айланди, деб хабар берди «Championat.asia» нашри.
Боиси футболчиларнинг айнан шунча фоизи ўз клуби билан 1 йиллик шартномага имзо чекишга одатланган. Бунда шартнома йилнинг сўнгги куни бўлган 31 декабрга қадар давом этади ва футболчи ўз-ўзидан эркин агентга айланиб қолади. Бугун эса 2017 йилнинг илк куни — 1 январь.
Бундай вақтда ўзбекистонлик футболчилар яхшироқ кўтарма пули берадиган жамоа излашга тушади ва ўша клуб сафига бориб қўшилади. Амалдаги жамоаси уни ўз сафида олиб қолишни истаса, ҳар йили бўлгани каби кўтарма пули тақдим этиши керак.
Ўз ишини нисбатан яхшироқ йўлга қўйган клубларда эса бундай вазият кузатилмайди. Улар футболчилар билан бир неча йиллик шартнома имзолашга ҳаракат қилади. Бу билан ҳар йили кўтарма пули беришдан нафақат қутилади, балки хориж клубларидан таклиф тушиб қолганида, футболчининг орқасидан пул ҳам ишлаб олади.
Масалан «Ал-Жаиш» Сардор Рашидовни ёки «Анжи» Одил Аҳмедовни харид қилиши учун «Пахтакор» ва «Бунёдкор» клубларига пул ўтказиб беради. Яъни, футболчини трансфер бозоридаги каби сотиб олади.
Бугун эркин агентга айланиб олган футболчиларни қўлга киритишни истаган клуб эса ҳеч бир жамоа ғазнасини бойитмайди, балки футболчининг ўзи билан келишиб, уни олиб кетаверади.