Уч нафар нигериялик аёл Африка тарихида илк бобслей терма жамоасини ташкил қилиб, 2018 йилги қишки Олимпиадада иштирок этмоқчи

Нигерияда Африка тарихида илк бобслей аёллар терма жамоаси ташкил этилиши мумкин. Уч нафар нигериялик қиз нафақат Пхёнчхан–2018 қишки Олимпиадасида иштирок этмоқчи, балки Африкада бобслей федерациясини ташкил қилмоқчи. Бу ҳақда TJournal хабар бермоқда.

Сеун Адигун, Нгози Онвумир ва Акиома Омега GoFundMe платформасида пул йиғиш кампаниясини бошлаб юборди. Авваллари улар югуриш бўйича Нигерия термаси шарафини ҳимоя қилганди. Сеун Адигун Лондон–2012 Олимпиадасида иштирок этган. Шунингдек, у бобслей бўйича АҚШ термаси сафида ҳаракат қилган.

«Молиявий ёрдамсиз спортдаги мақсадларимизга эриша олмаймиз. 2018 йилги Олимпиадага бориш учун бизга 150 минг доллар керак бўлади. Бу маблағ камга ўхшайди, аммо ишончим комил, биз керакли натижани кўрсата оламиз. Биргаликда имконсиз нарсанинг ўзи йўқлигини исботлаймиз», – деди бўлажак бобслей термасининг сардори Сеун Адигун.

Сеун Адигун барча пуллар спорт анжомлари, машғулотлар, транспорт, яшаш ва олимпия аъзолиги тўловига сарфланишига ваъда берди. 13 декабрь ҳолатига кўра уларга 13 минг доллар хайрия қилинди.

Моддий ёрдам келишига қараб, уч аёл видео ҳисоботлар ва шахсий сайтни ишга туширишни ваъда қилмоқда. Улар бобслей бўйича Африка тарихидаги биринчи аёллар терма жамоаси ҳақида батафсил маълумот бериб боришни истамоқда.

Спортчи аёлларнинг ташаббусига британиялик актёр, Нигериядан қочганлар оиласида туғилган Жон Боега эътибор қаратди. У Instagram’даги саҳифасида аёлларга омад тилади.

BuzzFeed нашри африкалик аёлларнинг воқеасини 1988 йилги Калгаридаги қишки Олимпиадада дебют қилган бобслей бўйича Ямайка термаси тарихига қиёслади.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.