Nigeriyada Afrika tarixida ilk bobsley ayollar terma jamoasi tashkil etilishi mumkin. Uch nafar nigeriyalik qiz nafaqat Pxyonchxan–2018 qishki Olimpiadasida ishtirok etmoqchi, balki Afrikada bobsley federatsiyasini tashkil qilmoqchi. Bu haqda TJournal xabar bermoqda.
Seun Adigun, Ngozi Onvumir va Akioma Omega GoFundMe platformasida pul yig‘ish kampaniyasini boshlab yubordi. Avvallari ular yugurish bo‘yicha Nigeriya termasi sharafini himoya qilgandi. Seun Adigun London–2012 Olimpiadasida ishtirok etgan. Shuningdek, u bobsley bo‘yicha AQSh termasi safida harakat qilgan.
“Moliyaviy yordamsiz sportdagi maqsadlarimizga erisha olmaymiz. 2018-yilgi Olimpiadaga borish uchun bizga 150 ming dollar kerak bo‘ladi. Bu mablag‘ kamga o‘xshaydi, ammo ishonchim komil, biz kerakli natijani ko‘rsata olamiz. Birgalikda imkonsiz narsaning o‘zi yo‘qligini isbotlaymiz”, – dedi bo‘lajak bobsley termasining sardori Seun Adigun.
Seun Adigun barcha pullar sport anjomlari, mashg‘ulotlar, transport, yashash va olimpiya a’zoligi to‘loviga sarflanishiga va’da berdi. 13-dekabr holatiga ko‘ra ularga 13 ming dollar xayriya qilindi.
Moddiy yordam kelishiga qarab, uch ayol video hisobotlar va shaxsiy saytni ishga tushirishni va’da qilmoqda. Ular bobsley bo‘yicha Afrika tarixidagi birinchi ayollar terma jamoasi haqida batafsil ma’lumot berib borishni istamoqda.
Sportchi ayollarning tashabbusiga britaniyalik aktyor, Nigeriyadan qochganlar oilasida tug‘ilgan Jon Boyega e’tibor qaratdi. U Instagram’dagi sahifasida ayollarga omad tiladi.
BuzzFeed nashri afrikalik ayollarning voqeasini 1988-yilgi Kalgaridagi qishki Olimpiadada debyut qilgan bobsley bo‘yicha Yamayka termasi tarixiga qiyosladi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)