Тошкент тиббиёт академиясининг ректори ўзгарди. Олий ўқув юртига эндиликда 46 ёшли тиббиёт фанлари доктори, профессор Лазиз Тўйчиев бошчилик қилади, деб хабар беради «Газета.uz».
Бунга қадар Лазиз Тўйчиев 2014 йил январидан буён Ўзбекистон соғлиқни сақлаш вазири ўринбосари лавозимида ишлаб келаётган эди. Унга қадар — 1993–2010 йилларда у Тошкент тиббиёт академиясида фаолият юритган. 2010 йилда Соғлиқни сақлаш вазирлиги санитария-эпидемия назорати Бош бошқармаси бошлиғи этиб тайинланган, 2012 йилдан эса эпидемиология, микробиология ва инфекцион хасталиклар илмий-тадқиқот институтига раҳбарлик қилган.
Тошкент тиббиёт академиясига охирги ўн йил давомида 71 ёшли Шавкат Каримов раҳбарлик қилиб келган эди.
Лазиз Тўйчиевнинг вазир ўринбосари лавозимидаги ўрнини Эльмира Боситхонова эгаллади. У, ўз навбатида, 13 декабрга қадар Ўзбекистон хотин-қизлар қўмитаси раиси ва Бош вазир ўринбосари сифатида фаолият юритиб келаётган эди.
Изоҳ (0)