Россия президенти Владимир Путин Forbes журнали версияси бўйича жаҳоннинг энг нуфузли кишилари рейтингида кетма-кет тўртинчи марта етакчилик қилмоқда. Бу ҳақда «Интерфакс» хабар берди.
«Россияда, Сурияда, АҚШдаги президент сайловида Россия етакчиси хоҳлаган нарсасига эришяпти», — деб ёзади рейтинг муаллифлари.
Forbes таҳририятининг фикрича, Россия раҳбари ўз нуфузини ва таъсирин деярли бутун сайёрага ёйган бўлиб, охирги йилларда унинг қудрати ўсиб бормоқда. Хусусан, журналда АҚШда уюштирилган, президент сайлови натижаларига таъсир кўрсатган хакерлик ҳужумлари тилга олинди.
Иккинчи ўринга АҚШнинг янги сайланган президенти Дональд Трамп қўйилди.
«Унинг жанжалларга иммунитети бор, Конгресснинг иккала палатаси ҳам у томонда, унинг шахсий давлати эса миллиардлаб долларга тенг», — деб изоҳ берилади журналда.
Учинчи поғонани жаҳоннинг энг нуфузли аёли, «Европа Иттифоқи асоси» — Германия канцлери Ангела Меркель эгаллади.
ХХР раиси Си Цзиньпин тўртинчи, Рим папаси Франциск эса бешинчи ўринга муносиб кўрилди. Бундан ташқари, Ҳиндистон бош вазири Нарендра Моди саккизинчи, Facebook асосчиси Марк Цукерберг эса ўнинчи натижани қайд қилди.